MƏDƏNİYYƏT
QƏBƏLƏNİ ABAD VƏ NÜMUNƏVİ ŞƏHƏRƏ ÇEVİRMƏK ÜÇÜN TƏDBİRLƏR PLANI HAZIRLANMIŞDIR
Qəbələ Rayon İcra Hakimiyyətinin təşəbbüsü ilə “Qəbələni abad və nümunəvi şəhərə çevirək” devizi altında abadlıq və yenidənqurma işləri aparmaq məqsədi ilə tədbirlər planı hazırlanmışdır.
AZƏRTAC-ın müxbiri xəbər verir ki, rayon icra hakimiyyəti başçısının, idarə və müəssisə rəhbərlərinin iştirakı ilə şəhərə baxış keçirilmişdir. Ümummilli liderimiz Heydər Əliyevin adını daşıyan mərkəzi meydandan başlayaraq Füzuli, İ.Qutqaşınlı, Nizami, 28 May küçələrində geniş abadlıq işlərinin görülməsi, meydanın ətrafında olan evlərin həyətlərinə daş hasar çəkilməsi planlaşdırılmışdır. Şəhərin təbii gözəlliyinə, memarlıq ənənələrinə xələl gətirən qanunsuz tikililər söküləcək, ticarət obyektləri, köşklər səliqəyə salınacaqdır. Şəhərin mərkəzində yerləşən Heydər bağında da yenidənqurma işləri aparılacaq, burada əhalinin istirahəti və rahatlığı üçün hər cür şərait yaradılacaqdır.