QIRĞIZISTAN HÖKUMƏTİ İSTEFA VERMİŞDİR
Qirğizistan Prezidenti İcra Aparatının rəhbəri Amanbəy Karıpkulov, habelə baş nazir Kurmanbay Bakiyev istefa vermişlər. Onların istefası ölkənin Təhlükəsizlik Şurasının iclasında qəbul edilmişdir. Bu barədə Şuranın katibi Misir Aşirkulov Bişkekdə mətbuat konfransında bildirmişdir.
Onun dediyinə görə, baş nazir ilə birlikdə bütün hökumət, o cümlədən daxili işlər naziri Temirbay Akmatəliyev də avtomatik olaraq istefaya gedirlər. Çubak Abışkayevin Baş prokuror vəzifəsindən getmək haqqında ərizəsi hələlik qəbul edilməmişdir.
İTAR-TASS xəbər verir ki, baş nazirin birinci müavini Nikolay Tanayev hökumət başçısı vəzifəsinin icraçısı təyin olunmuşdur. Baş nazir və Prezidentin icra Aparatının rəhbəri bu il martın 17-18-də respublikada baş vermiş faciəli hadisələr ilə əlaqədar istefaya getmişlər. Həmin vaxt ölkənin cənubunda kütləvi iğtişaşlar zamanı beş nəfər həlak olmuş və onlarca adam yaralanmışdır.
Bölmənin digər xəbərləri
