Qırmızı Qəsəbədə 26 İyar günü qeyd olunub
Bakı, 22 may, AZƏRTAC
Qırmızı Qəsəbədə (Krasnaya Sloboda) Qurtuluş və Azadlıq Günü münasibətilə İkinci Dünya müharibəsi cəbhələrində həlak olmuş dağ yəhudilərinin şərəfinə ucaldılmış “Əbədi şöhrət” abidəsinin ətrafında toplaşan tədbir iştirakçıları STMEGİ Beynəlxalq Xeyriyyə Fondunun prezidenti German Zaxaryayevin adından heykəlin önünə çələng qoyub və gül dəstələri düzüblər.
AZƏRTAC xəbər verir ki, Quba Rayon İcra Hakimiyyətinin Qırmızı Qəsəbə üzrə nümayəndəsi Telman Muxailov və qəsəbə bələdiyyəsinin sədri Yafo Yadadyaev mərasim iştirakçılarını Qurtuluş və Azadlıq Günü münasibətilə təbrik ediblər.
T.Muxailov qeyd edib ki, İyar ayının 26-nın yəhudi təqviminə əlavə edilməsi təşəbbüsü ilə 2014-cü ildə STMEGİ Beynəlxalq Xeyriyyə Fondunun prezidenti German Zaxaryayev çıxış edib. Bu təşəbbüs bütün dünyada yəhudi icması tərəfindən təqdirlə qarşılanıb. Yəhudilər də digər azadlıqsevər xalqlarla birlikdə mənfur düşmən üzərində Qələbəni yaxınlaşdırıblar. 1941-1945-ci illərdə Qırmızı Qəsəbədən 600-dən çox insan könüllü olaraq müharibəyə gedib. Onların yarısı vətən uğrunda gedən döyüşlərdə qəhrəmancasına həlak olub. Müharibədən sonra 300-ə yaxın insan orden və medallarla öz vətəninə - Qırmızı Qəsəbəyə qayıdıb. Bu gün bir nəfər də olsun müharibə iştirakçısı sağ qalmasa da, kənd sakinləri vətənin müdafiəsi uğrunda canlarından keçmiş qəhrəmanların xatirəsini böyük ehtiramla yad edirlər.
Bölmənin digər xəbərləri
