Qış fəsli ərəfəsində Avropa anbarlarında qaz ehtiyatları 80 faizi ötüb
Bakı, 15 sentyabr, AZƏRTAC
Avropa payız-qış mövsümü üçün yeraltı qaz anbarlarının 80 faizini doldurub.
AZƏRTAC xəbər verir ki, “Gas Infrastructure Europe” assosiasiyasının məlumatına görə, sentyabrın 13-də anbarlara qaz doldurulması 295 milyon kubmetr, qaz götürülməsi isə 33 milyon kubmetr təşkil edib. Hazırda Avropanın yeraltı anbarlarında 88,4 milyard kubmetr (80,34 faiz) qaz var ki, bu da son beş ilin analoji dövrünün orta göstəricisindən 6,76 faiz azdır.
Avropa Komissiyasının tələblərinə əsasən, üzv ölkələr hər il noyabrın 1-dək özlərinin qaz anbarlarını 90 faizədək doldurmalıdır.
Bu həftə Avropada havanın öncəki yeddi günlə müqayisədə bir qədər mülayim keçəcəyi proqnozlaşdırılır. Avqust ayında Avropanın elektrik enerjisi istehsalında külək generasiyasının payı 14 faiz, sentyabrın ötən dövründə isə ortalama 17 faiz olub.
Cari ay terminallardan Avropanın qazötürmə sisteminə maye qaz vurulması bu dövr üçün ən maksimal səviyyəsinə çatıb. Hazırda bu göstərici maksimum gücün 45 faizini təşkil edir.
London ICE birjasında min kubmetr qazın qiyməti avqustda ortalama 394 dollar, sentyabrda isə 393 dollar olub.
Bölmənin digər xəbərləri
