Qonşusunu qəsdən öldürməkdə təqsirləndirilən şəxs barəsində cinayət işi üzrə istintaq yekunlaşdırılıb
Bakı, 4 noyabr, AZƏRTAC
Neftçala rayonunun Bankə qəsəbə sakini 1989-cu il təvəllüdlü Mirağa Musayevin iyulun 22-də qəsdən öldürülməsi faktı ilə bağlı Neftçala Rayon Prokurorluğunda Cinayət Məcəlləsinin müvafiq maddəsi ilə başlanmış cinayət işinin istintaqı yekunlaşdırılıb.
Neftçala Rayon Prokurorluğunun AZƏRTAC-a daxil olan məlumatında bildirilib ki, istintaqla zərərçəkmişin qonşusu Famil Baloğlanovun şəxsi münasibətlər zəminində aralarında yaranmış mübahisə zamanı Mirağa Musayevə bıçaqla xəsarətlər yetirərək onu valideynlərinin gözləri qarşısında qəsdən öldürdüyü müəyyən olunub.
Famil Baloğlanov Cinayət Məcəlləsinin 120.2.4-cü (xüsusi amansızlıqla və ya ümumi təhlükəli üsulla adam öldürmə) maddəsi ilə təqsirləndirilən şəxs qismində cəlb olunmaqla barəsində məhkəmənin qərarı ilə həbs qətimkan tədbiri seçilib.
Hazırda cinayət işi baxılması üçün aidiyyəti üzrə Lənkəran Ağır Cinayətlər Məhkəməsinə göndərilib.
Bölmənin digər xəbərləri
