“QUŞ QRİPİ” İLƏ BAĞLI NÖVBƏTİ MONİTORİNQ BAŞA ÇATMIŞDIR
Ölkə ərazisində “quş qripi” ilə bağlı dekabrın 15-dən başlanmış növbəti monitorinq başa çatmışdır.
Kənd Təsərrüfatı Nazirliyi yanında Dövlət Baytarlıq Xidmətindən AZƏRTAC-a bildirmişlər ki, Abşeron yarımadasında, Dəvəçi, Salyan, Ağcabədi və Lənkəran rayonlarındakı milli park və qoruqlarda, dənizsahili zonalarda aparılmış monitorinqdə Ekologiya və Təbii Sərvətlər, Səhiyyə nazirliklərinin, Ovçular Cəmiyyətinin mütəxəssisləri də iştirak etmişlər.
Monitorinq zamanı seçmə üsulla ovlanmış 25 baş çöl, 47 baş ev quşunun patoloji materialı, ayrı-ayrı həyətyanı və quşçuluq təsərrüfatlarında 2982 baş ev quşundan götürülmüş qan nümunələri respublika baytarlıq laboratoriyasında müayinə olunmuşdur. Nümunələrin heç birində “quş qripi” xəstəliyinin törədicisi aşkar edilməmişdir.
Dövlət Baytarlıq Xidməti əhalinin nəzərinə çatdırır ki, köçəri quşların miqrasiyası ilə əlaqədar ev quşları qapalı şəraitdə saxlanmalıdır. Köçəri və çöl quşlarının ovlanması, satılması, onlardan qida məhsulu kimi istifadə olunmasına qoyulan qadağa qüvvədədir.
Bölmənin digər xəbərləri
