QVARNERİNİN SKRİPKASI BAKIDA SƏSLƏNİR
Suraxanıdakı Atəşgahda Azərbaycan skripkaçısı Anar İbrahimovun konserti olmuşdur. Musiqiçi məşhur bəstəkarların əsərlərini onların müasirlərinin Qvarneri del Cezu adlandırdıqları italiyalı usta Cuzeppe Qvarnerinin hazırladığı əfsanəvi skripkada ifa etmişdir. Alimlər bu ecazkar sənət incisinin sirlərini indiyədək aça bilməmişlər.300 ilə yaxın yaşı olan bu skripkada vaxtilə Paqanini, Kreysler, David Oystrax, Gidon Kremer kimi dünya şöhrətli musiqiçilər çalmışlar.
Azərbaycan musiqiçisinin bu qədim və misilsiz alətdə çalması İtaliyanın ölkəmizdəki diplomatik nümayəndəliyinin başçısı xanım Marqarita Kostanın səyləri sayəsində mümkün olmuşdur. Anarın solo konsertini dinlədikdən sonra o, skripkanı Bakıya gətirtməyi qərara almışdır.
Anar İbrahimov bu yaxınlarda İsveçrədən qayıtmışdır. O, məşhur skripkaçı Gidon Kremerin dəvəti ilə musiqi festivalında iştirak edirdi. Gənc musiqiçi səfər zamanı Viktor Tretyakovdan ustad dərsləri almışdır və gələn il yenidən bu ölkəyə getmək niyyətindədir. Anar gələcək çıxışlarının proqramını da tərtib etmişdir. Proqrama Paqanini, Bize, Sen-Sans və Qara Qarayevin əsərləri daxil edildir.
Beş yaşından musiqi ilə məşğul olan Anar skripkanı həyatının mənası hesab edir.
Bölmənin digər xəbərləri
