RABİTƏ VƏ İNFORMASİYA TEXNOLOGİYALARI NAZİRİ ABŞ-DA İŞGÜZAR SƏFƏRDƏDİR
Nazirliyin mətbuat xidmətindən AZƏRTAC-a bildirmişlər ki, səfər müddətində Ə.Abbasov rabitə sahəsində fəaliyyət göstərən qurumlarda görüşlər keçirəcək, ABŞ-ın Kommersiya Departamenti rəhbərinin müavini Franklin Lavinlə bu il oktyabrın 3-6-da Bakıda ölkə Prezidenti İlham Əliyevin himayəsi altında keçiriləcək XII Beynəlxalq “Telekommunikasiya və İnformasiya Texnologiyaları” sərgisi çərçivəsində imzalanacaq Anlaşma Memorandumunun şərtlərini müzakirə edəcəkdir.
Sonra nazir Vaşinqtonda “USTDA”, “SPR”, ABŞ-ın Kommersiya Departamenti, ABŞ-Azərbaycan Ticarət Palatası, Azərbaycanın ABŞ-dakı səfirliyinin birgə təşkilatçılığı ilə keçiriləcək informasiya-kommunikasiya texnologiyaları (İKT) üzrə biznes-forumda və Kaliforniya ştatının San Xose şəhərində təşkil ediləcək İKT üzrə I ABŞ-Azərbaycan biznes-forumunda əsas məruzəçi kimi çıxış edəcəkdir. O, Kaliforniyada texnoparkların yaradılmasında böyük təcrübəsi olan Stenford Universitetinin Beynəlxalq Tədqiqat Mərkəzində də xüsusi iqtisadi zonaların formalaşdırılması təcrübəsi ilə yaxından tanış olacaqdır.
Daha sonra nazir Əli Abbasov “Microsoft”un Sietl şəhərində yerləşən Baş qərargahında şirkətin vitse-prezidenti cənab Stiv Barmerlə və digər rəhbər işçilərlə görüşüb “Microsoft”un Azərbaycanda yeni fəaliyyəti haqqında müzakirələr aparacaqdır.
ABŞ-da keçiriləcək tədbirlərdə Rabitə və İnformasiya Texnologiyaları Nazirliyinin nümayəndələri, həmçinin “Sinam”, “Ultra”, “Azel” şirkətlərinin prezidentləri, “HP”, “Cisko”, “Microsoft” şirkətlərinin Azərbaycan nümayəndəliklərinin rəhbərləri və AMEA-nın İnformasiya Texnologiyaları İnstitutunun direktoru iştirak edəcəkdir.
Səfər iyulun 17-dək davam edəcəkdir.
