RAMAZAN AYININ BAŞLANMASINI MÜƏYYƏNLƏŞDİRƏN ELEKTRON TELESKOP YARADILMIŞDIR
AZƏRTAC xəbər verir ki, Amerikanın NASA Kosmik Agentliyininin alimi, Tunis əsilli Məhəmməd Əl-Əlyari təzə ayın başlanmasını maksimal dəqiqliklə müəyyənləşdirə bilən elektron teleskop yaratmışdır.
İxtiraçı Tunisin paytaxtından 120 kilometr cənubda yerləşən Keruan şəhərində keçirilmiş elmi simpoziumda bildirmişdir ki, onun yaratdığı teleskop təzə ayın başlanmasını müəyyən edən ilk elektron qurğudur. Kosmik texnika mütəxəssisi bildirmişdir ki, teleskop iki ildən sonra hazır olacaqdır.
Teleskopun yaradılması təqribən üç il vaxt aparmış və 67 milyon dollara başa gəlmişdir. İlk dəfə teleskop Fransanın Marsel şəhərində keçirilmiş astronomiya simpoziumunda təqdim olunmuş və onun elmi dəyəri təsdiq edilmişdir. İyunun 23-dən 28-dək keçirilmiş illik elmi konqresdə kosmik teleskop astronomiya və kosmik texnika sahəsində bir çox ekspertlər tərəfindən yüksək qiymətləndirilmişdir.
Bölmənin digər xəbərləri
