Ramazan Dikbaş: Azərbaycanlı qardaşlarımızın ağır günlərimizdə yanımızda olmasından qürur duyuruq
Muğla, 7 avqust, AZƏRTAC
Çox çətin günlər yaşayırıq. Artıq 7-8 gündür ki, amansız yanğın hər tərəfdən bizi mühasirəyə alıb. Küləyin tez-tez güclənməsi yanğını söndürmək istiqamətində zəhmətimizi çox vaxt heçə endirir. Alovlar bir göz qırpımında şiddətlənir. Belə ağır, çətin günlərdə azərbaycanlı qardaşlarımızın yanımızda olmasından qürur duyuruq.
Bu fikirləri AZƏRTAC-ın xüsusi müxbirinə açıqlamasında Muğla vilayətinin Köyceğiz rayonundakı meşə yanğınlarının söndürülməsində iştirak edən Ramazan Dikbaş ifadə edib.
Yanğınların başladığı gündən ağır fəsadlara yol açdığını bildirən R.Dikbaş deyib: “Yanğın təkcə meşələrimizi deyil, insanların evlərini, var-dövlətini, ətrafdakı bütün canlıları məhv edir. Bu faciəni görmək çox çətin və ağrılıdır. Əlimizdən gələn hər bir şeyi edirik ki, alovlar daha çox fəsad törətməsin. Bu anlarda azərbaycanlı yanğınsöndürən və xilasedicilər ilə çiyin-çiyinə çalışmaq həqiqətən də bizim üçün fəxrdir. Bu, əsl qardaşlıq nümunəsi, yüksək insanpərvərlikdir”.
Sabir Şahtaxtı
AZƏRTAC-ın xüsusi müxbiri
Muğla
Bölmənin digər xəbərləri
