RAYON BƏLƏDİYYƏ SƏDRLƏRİNİN TOPLANTILARINDA ŞƏHƏR, QƏSƏBƏ VƏ KƏNDLƏRİN SOSİAL-İQTİSADİ İNKİŞAFINDA, YERLİ ƏHƏMİYYƏTLİ LAYİHƏLƏRİN HƏLLİNDƏ BƏLƏDİYYƏLƏRİN İŞTİRAKI MƏSƏLƏSİ GENİŞ MÜZAKİRƏ EDİLİR
Şəhər, qəsəbə və kənd bələdiyyələri milli assosiasiyalarının təşəbbüsü və Prezidentin İcra Aparatı regional idarəetmə və yerli özünüidarəetmə orqanları ilə iş şöbəsinin təşkilatçılığı ilə aprelin 16-dan başlayaraq rayonlarda yerli özünüidarəetmə qurumları sədrlərinin toplantıları keçirilir.
“Şəhər, qəsəbə və kəndlərin sosial-iqtisadi inkişafında, yerli əhəmiyyətli layihələrin həllində bələdiyyələrin iştirakı” mövzusunda keçirilən toplantılarda yerli özünüidarəetmə qurumlarının fəaliyyətinin təkmilləşdirilməsi, qazanılmış uğurların təhlili, mövcud problemlərin və onların həlli yollarının araşdırılması və qarşıda duran vəzifələrin müəyyənləşdirilməsi məsələləri müzakirə olunur.
AZƏRTAC-ın müxbirləri rayonlarda keçirilən toplantılardan hesabatlar hazırlamışlar.
ZAQATALA RAYONU
Zaqatala şəhərində “Qala düzü” İstirahət Mərkəzində keçirilən toplantını Azərbaycan qəsəbə bələdiyyələrinin Milli Assosiasiyasının bələdiyyələrlə iş departamentinin direktoru Tofiq Həsənov açaraq gündəliyə “Şəhər, qəsəbə və kəndlərin sosial-iqtisadi inkişafında, yerli əhəmiyyətli layihələrin həllində bələdiyyələrin iştirakı” və “Rayon bələdiyyə sədrləri şurasının yeni tərkibi haqqında” məsələlərin daxil olduğunu bildirmişdir.
Gündəlikdə duran birinci məsələ barədə məruzə edən Azərbaycan şəhər bələdiyyələri Milli Assosiasiyasının icra katibi Mirrauf Mənafov ümummilli lider Heydər Əliyevin rəhbərliyi ilə demokratik dəyərlərə və prinsiplərə uyğun olaraq hazırlanmış və 1995-ci il noyabrın 12-də qəbul olunmuş Azərbaycan Respublikasının ilk Konstitusiyasının ölkəmizdə genişmiqyaslı demokratik islahatlara böyük imkanlar açdığını bildirmiş, Əsas Qanunumuzda dövlətin əks-mərkəzləşmə siyasətinin əsası qoyulmaqla, yerli özünüidarəetmə orqanları olan bələdiyyələrin yaranması, bu quruma seçkilərin keçirilməsi barədə müvafiq müddəaların öz əksini tapdığını vurğulamışdır.
Görkəmli dövlət və siyasi xadimin 1999-cu ildə ilk bələdiyyə seçkiləri ilə bağlı xalqımıza müraciətində dediyi “Biz Azərbaycanda qeyri-dövlət, tam müstəqil yerli özünüidarəetmə orqanları yaradırıq, bu, həm də demokratiyanın inkişafı deməkdir, eyni zamanda, ölkəni idarə etməkdə vətəndaşlarımıza imkanlar yaradılmasının göstəricisidir. Yerli idarəetmə orqanları yerlərdə səlahiyyətləri çərçivəsində, qanun çərçivəsində çox iş görə bilərlər” fikirləri artıq bu günümüzün reallığına çevrilmişdir.
Bu gün respublikamızda yerli özünüidarəetmə sisteminin Azərbaycan Prezidenti İlham Əliyev tərəfindən məqsədyönlü şəkildə inkişaf etdirildiyini bildirən məruzəçi, son dövrlər bu sahədə qəbul olunmuş qanunların, normativ-hüquqi aktların bələdiyyələrin hərtərəfli inkişafına geniş imkanlar açdığını xüsusi vurğulamışdır. Məruzəçi bildirmişdir ki, Azərbaycan şəhər, qəsəbə və kənd bələdiyyələrinin Milli Assosiasiyalarının yaradılması 7 illik bələdiyyə təcrübəsinin doğurduğu zərurət idi və bu zərurət məhz Prezident İlham Əliyevin dəstəyi ilə reallığa çevrilmişdir.
Bələdiyyələrin milli assosiasiyalarının təşkilatlanması prosesinin ilkin mərhələsinin artıq başa çatdığını söyləyən natiq, hazırda əsas diqqətin sosial, iqtisadi və ekoloji proqramların hazırlanmasına, bələdiyyələrin fəaliyyətinin səmərəliliyinin daha da artırılmasına yönəldiyini bildirmişdir. Məruzəçi bütün yerli özünüidarəetmə orqanlarını Bələdiyyələrin Milli Assosiasiyasının təşəbbüsü ilə 2007-ci ildə “Bir bələdiyyəyə- azı bir layihə” çağırışına qoşulmağa səsləmiş, “Abad şəhər”, “Abad qəsəbə”, “Abad kənd”, “Abad məhəllə”, “Abad küçə”, “Bələdiyyə parkı”, “Uşaq evləri, ahıllar və kimsəsizlərə qayğı” və digər bu kimi layəhələrin hazırlanaraq həyata keçirilməsinin bələdiyyələrin nüfuzunun daha da artmasına gətirib çıxaracağını bildirmişdir.
Toplantıda Zaqatala Rayon İcra Hakimiyyətinin başçısı Asif Əsgərov çıxış edərək, son bir ildə rayonda həyata keçirilən genişmiqyaslı tikinti-quruculuq və abadlıq işlərindən söz açmış, bu sahədə bələdiyyələrin rolunu xüsusi qeyd etmişdir. İcra başçısı, eyni zamanda, bəzi bələdiyyələrin rayonda gedən sosial-iqtisadi proseslərə seyrçi mövqedən yanaşmalarını, topladıqları vergiləri yalnız bələdiyyələrin saxlanılmasına və ezamiyyə xərclərinə yönəltmələrini tənqid etmiş, yerli özünüidarəetmə qurumlarının fəaliyyətinin səmərəliliyinin artırılmasında belə görüşlərin böyük əhəmiyyətini xüsusi vurğulamışdır.
Toplantıda Zaqatala şəhər bələdiyyəsinin sədri Arif Əsədov, Əliabad qəsəbə bələdiyyəsinin sədri, qəsəbə bələdiyyələri milli assosiasiyasının idarə heyətinin üzvü Cəfər Əliyev, Göyəm bələdiyyəsinin sədri Murtuzəli Şabanov və başqaları çıxış edərək, rəhbərlik etdikləri bələdiyyələrin fəaliyyəti barədə məlumat vermiş, təkliflərini bildirmişlər.
Toplantının sonunda səsvermə yolu ilə rayon bələdiyyə sədrləri şurasının 7 nəfərdən ibarət tərkibi müəyyənləşmiş, Zaqatala şəhər bələdiyyəsinin sədri Arif Əsədov şuranın sədri seçilmişdir.
BALAKƏN RAYONU
Balakən şəhərində bələdiyyə sədrləri, habelə rayon icra hakimiyyətinin rəhbərliyi və əlaqədar qurumların nümayəndələrinin iştirakı ilə keçirilən toplantıda “Şəhər, qəsəbə və kəndlərin sosial-iqtisadi inkişafında, yerli əhəmiyyətli layihələrin həllində bələdiyyələrin iştirakı” mövzusunda məruzə ilə çıxış edən Azərbaycan şəhər bələdiyyələri milli assosiasiyasının icra katibi Mirrauf Manafov yerli özünüidarəetmə orqanlarının yaradılması və təşkilatlanması sahəsində görülən işlərə toxunmuş, demokratik cəmiyyət quruculuğu prosesində bələdiyyələrin rolu, bələdiyyələrin milli assosiasiyalarının yaradılması və digər məsələlər barədə danışmışdır.
Məruzəçi bildirmişdir ki, ümummilli lider Heydər Əliyevin rəhbərliyi ilə 1995-ci ildə demokratik dəyərlər və prinsiplərə uyğun olaraq hazırlanmış müstəqil Azərbaycan Respublikasının ilk Konstitusiyasının qəbul edilməsi ölkəmizdə genişmiqyaslı demokratik islahatların həyata keçirilməsinin əsasını qoymuşdur. Konstitusiyada respublikamız üçün yeni olan yerli özünüidarəetmə orqanları - bələdiyyə təsisatları ilə bağlı müddəaların nəzərdə tutulması xüsusi əhəmiyyət daşıyır. 1999-cu və 2004-cü illərdə keçirilən bələdiyyə seçkilərinin uğurlu nəticələri ulu öndərimizin vaxtilə dediyi - “Biz Azərbaycanda qeyri-dövlət, tam müstəqil yerli özünüidarəetmə orqanları yaradırıq, bu, həm də demokratiyanın inkişafı deməkdir” fikirlərini tam reallığa çevirmişdir və bu gün bələdiyyə sistemi inkişaf etməkdə və özünü doğrultmaqda davam edir.
Natiq bildirmişdir ki, bələdiyyələrin Milli Assosiasiyalarının əsas məqsədi bələdiyyələrin fəaliyyətinin əlaqələndirilməsinə, həmin fəaliyyətin beynəlxalq hüquq normalarına və mövcud qanunvericiliyə uyğun qurulmasına və ortaya çıxan problemlərin birgə həll edilməsinə kömək göstərmək yolu ilə Azərbaycan Respublikasında yerli özünüidarənin möhkəmlənməsinə və inkişafına nail olmaqdır.
Toplantıda çıxış edən Balakən Rayon İcra Hakimiyyətinin başçısı Asif Məmmədov yerli özünüidarəetmə orqanlarının rayonda həyata keçirilən tədbirlərdə fəal iştirakını xüsusi qeyd etmiş, onlara gələcək fəaliyyətlərində uğurlar arzulamışdır.
Mövzu ətrafında müzakirələrdən sonra rayon bələdiyyə sədrləri şurasının yeni tərkibi müəyyənləşdirilmişdir. Şəhər bələdiyyəsinin sədri Mustafa Muradov açıq səsvermə yolu ilə şuranın sədri seçilmişdir.
Zaqatala və Balakən rayonlarında keçirilən toplantılarda Prezidentin İcra Aparatının regional idarəetmə və yerli özününidarəetmə orqanları ilə iş şöbəsinin məsul işçiləri Məhərrəm Quliyev və Rüfət Əliyev iştirak etmişlər.
DƏVƏÇİ RAYONU
Dəvəçi rayonunda keçirilən toplantıda Kənd Bələdiyyələri Milli Assosiasiyasının icra katibi Əli Mehdiyev çıxış edərək bildirmişdir ki, tədbirin keçirilməsindən məqsəd rayon ərazisində fəaliyyət göstərən bələdiyyələrin problemləri ilə yerində tanış olmaq, onların fəaliyyətini canlandırmaq, yeni yaranmış şəhər, qəsəbə və kənd bələdiyyələri milli assosiasiyaları ilə əməkdaşlığın möhkəmləndirilməsinə nail olmaq, müxtəlif təyinatlı layihələrin hazırlanması və icrasında özünüidarəetmə orqanlarına kömək etməkdir.
Qəsəbə bələdiyyələri milli assosiasiyasının icra katibi Mahir Allahyarov məruzə ilə çıxış edərək assosiasiyaların yaradılmasını zəruri edən səbəblərdən, qarşıya qoyulmuş vəzifələrdən, bələdiyyələrin yerli problemlərin həllinə fəal surətdə cəlb olunmasından, həm ölkədaxili, həm də beynəlxalq qurumlar vasitəsilə yerli özünüidarəetmə orqanlarının fəaliyyətini canlandırmaq üçün atılacaq addımlardan danışmışdır. Bildirilmişdir ki, sayı 2300-ü ötən bələdiyyələrin fəaliyyətinin əlaqələndirilməsi, donor təşkilatlarla əməkdaşlığın qurulması, yerli problemlərin həlli və əhaliyə xidmətin səviyyəsini yüksəltmək üçün maliyyə mənbələrinin axtarılıb tapılmasına yardım etmək assosiasiyaların qarşısında duran başlıca vəzifələrdir. 2007-ci ildə assosiasiyalar “Bir bələdiyyə-bir layihə” təşəbbüsü ilə çıxış etmişdir ki, həmin təşəbbüs çərçivəsində də “Abad şəhər”, “Abad qəsəbə”, “Abad kənd”, “İçməli su”, “İlk məktəb günü”, “Suvarma suyu” və digər layihələr hazırlanıb reallaşdırıla bilər. Bu, il ərzində əhalinin 2000-2500 probleminin həlli deməkdir.
Assosiasiyaların fəaliyyətinin artıq beynəlxalq qurumların diqqətini cəlb etdiyini vurğulayan M.Allahyarov bildirmişdir ki, ötən ay Avropa Şurası Yerli və Regional Hakimiyyətlər Konqresi ilə əməkdaşlıq əlaqələri qurulmuş, qarşılıqlı fəaliyyətin perspektivləri haqqında fikir mübadiləsi aparılmışdır.
Toplantıda rayon icra hakimiyyətinin başçısı Sündüz Babayeva, Xaçmaz bələdiyyəsinin sədr müavini Atabala Cavadov, Çölquşçu bələdiyyəsinin sədri İlham Səfiyev, Əmirxanlı bələdiyyəsinin sədri, Kənd Bələdiyyələri Assosiasiyasının nəzarət-təftiş komissiyasının sədri Rəsul Məmmədov, Ağalıq bələdiyyəsinin sədri Məmmədşah Nuriyev, Düzbilici bələdiyyəsinin sədri Minayə Xəlilova və digərləri çıxış edərək rayonda fəaliyyət göstərən 36 bələdiyyənin həm öz gəlirləri, həm dövlət dotasiyası və həm də Almaniya Texniki Əməkdaşlıq Təşkilatının yardımı ilə həyata keçirdikləri layihələrdən, qarşılaşdıqları problemlərdən, gələcəkdə reallaşdırılması planlaşdırılan layihələrdən danışmışlar.
Prezidentin İcra Aparatı regional idarəetmə və yerli özünüidarəetmə orqanları ilə iş şöbəsinin sektor müdiri Ramiq Həşimov toplantı iştirakçılarını diskussiyaya cəlb edərək işgüzar şəraitdə problemlərin müzakirəsini təşkil etmiş, onlarla açıq söhbət apararaq gələcək layihələrin yerli problemlərin həllində oynayacağı roldan, bələdiyyə sədrlərinin maarifləndirilməsi, təcrübə mübadiləsinin aparılması məsələlərindən danışmışdır.
Toplantıda bələdiyyə sədrləri şurasının 7 nəfərdən ibarət tərkibi seçilmiş, Dəvəçi bələdiyyəsinin sədri Aydın Xəlilov şuranın sədri təsdiq olunmuşdur.
LERİK RAYONU
Lerikdə şəhər, qəsəbə və kəndlərin sosial-iqtisadi inkişafında və yerli əhəmiyyətli layihələrin həllində bələdiyyələrin iştirakına həsr olunmuş toplantı keçirilmişdir.
Azərbaycan şəhər, qəsəbə və kənd bələdiyyələrinin Milli Assosiasiyalarının təşəbbüsü ilə keçirilən tədbirdə rayonda fəaliyyət göstərən yerli özünüidarəetmə orqanlarının sədrləri, ərazi icra nümayəndələri, idarə, müəssisə və təşkilatların rəhbərləri iştirak etmişlər.
Toplantıda Azərbaycan Şəhər Bələdiyyələri Milli Assosiasiyasının sədri Əbülfəz Babayev çıxış edərək yerli özünüidarəetmə orqanlarının şəhər, qəsəbə və kəndlərin sosial-iqtisadi inkişafında və yerli əhəmiyyətli layihələrin həllində iştirakını təmin etmək üçün qarşıda duran vəzifələrdən danışmış, bələdiyyələrin fəaliyyətini əlaqələndirmək və onlara kömək məqsədi ilə yaradılan milli assosiasiyaların əsas iş prinsiplərini diqqətə çatdırmışdır.
Azərbaycan Kənd Bələdiyyələrinin Milli Assosiasiyasının bələdiyyələrlə iş departamentinin direktoru Namiq Quliyev toplantıda müzakirə edilən məsələ ilə bağlı məruzə ilə çıxış etmişdir.
1999-cu ildə ölkəmizdə yerli özünüidarəetmə orqanlarına keçirilən ilk seçkilərdən ötən 7 il müddətində bələdiyyələrin onlara verilmiş səlahiyyətləri çərçivəsində yerli əhəmiyyətli məsələlərin həllində fəal iştirakını diqqətə çatdıran natiq, bələdiyyələrə əlavə səlahiyyətlərin verilməsi haqqında qanun layihəsi Milli Məclisdə təsdiq edildikdən sonra yerlərdə sosial-iqtisadi və ekoloji proqramların həyata keçirilməsinə real imkanlar yaranacağını vurğulamışdır.
Qeyd olunmuşdur ki, bələdiyyələrin milli assosiasiyaları 2007-ci ildə “Bir bələdiyyə - azı bir layihə” təşəbbüsünü irəli sürərək yerli özünüidarəetmə orqanlarının region əhəmiyyətli məsələlərin həllində fəallığını artırmaq və onların fəaliyyətini düzgün əlaqələndirmək məqsədi ilə müxtəlif tədbirlər həyata keçiriləcəkdir.
Toplantıda Lerik Rayon İcra Hakimiyyətinin başçısı Rövşən Bağırov çıxış edərək Prezident İlham Əliyevin rəhbərliyi ilə ölkəmizin sosial-iqtisadi inkişafı sahəsində əldə edilmiş nailliyyətlərdən danışmış, regionların sosial-iqtisadi inkişafı Dövlət Proqramının icrası istiqamətində Lerikdə həyata keçirilən tədbirləri və 2007-ci ildə qarşıda duran vəzifələri diqqətə çatdırmışdır.
Toplantıda çıxış edən bələdiyyə sədrləri və ərazi icra nümayəndələri yerlərdə həyata keçirilən layihələrin əhəmiyyətindən danışmış, onları narahat edən məsələlər və mövcud problemlərlə bağlı təkliflərini bildirmişlər.
Prezidentin İcra Aparatı regional idarəetmə və yerli özünüidarəetmə orqanları ilə iş şöbəsinin məsul işçisi Mikayıl Hüseynov toplantıda çıxış edərək ölkəmizin başçısı İlham Əliyevin Lerikə səfərlərindən sonra rayonda quruculuq işlərinin geniş vüsət aldığını bildirmiş, yerli əhəmiyyətli layihələrin həllində rayonda fəaliyyət göstərən sahibkarlarla yanaşı, xaricdə yaşayan soydaşlarımızın imkanlarından da səmərəli istifadə edilməsinin və bu məqsədlə rayonda biznes-forumun keçirilməsinin vacibliyini vurğulamışdır.
Toplantıda rayon bələdiyyə sədrlərinin 9 nəfərdən ibarət əlaqələndirmə şurasının tərkibi təsdiq edilmiş, Hüseynağa Şahıyev şuranın sədri seçilmişdir.
Bölmənin digər xəbərləri
