RƏCƏB TAYYİB ƏRDOĞAN QAFQAZ İTTİFAQININ YARADILA BİLƏCƏYİNİ DEMİŞDİR
AZƏRTAC-ın xüsusi müxbiri xəbər verir ki, Türkiyənin Baş naziri Rəcəb Tayyib Ərdoğan Qafqazda sabitliyin və sülhün bərqərar olması üçün Qafqaz İttifaqının yaradıla biləcəyini və Türkiyənin ona daxil olmasının mümkünlüyünü bildirmişdir.
Rəcəb Tayyib Ərdoğan demişdir ki, bu ittifaqın yaradılması üçün güclü dövlətlərlə danışıqlar aparılacaqdır. Bu məsələ ilə bağlı BMT-nin baş katibi Pan Gi Munla da telefonla danışacağını deyən Baş nazir əlavə etmişdir ki, ABŞ, Avropa ölkələri və Türkiyə birlikdə bu istiqamətdə addım atarlarsa, Cənubi Qafqazda sülhə zəmin hazırlana bilər.
Rusiyanın da bu ittifaqda yer almasının zəruri olduğunu vurğulayan Rəcəb Tayyib Ərdoğan avqustun 11-də Rusiya mətbuatında Vladimir Putinin guya onun telefon zənginə cavab verməməsi barədə yayılan xəbərlərin yalan olduğunu, rusiyalı həmkarına zəng etmədiyini bildirmişdir.
Bakı-Tbilisi-Ceyhan kəmərində baş vermiş partlayış yerinin yaxınlığında 9 əsgərin şəhid olmasına münasibətini bildirən Ərdoğan nəqliyyat nazirinin hadisə yerinə göndərildiyini söyləməklə yanaşı, jurnalistin boru kəmərinin bombalanması sualına cavab verərkən, ilk dəfə terror aktı faktını dolayısı ilə təsdiq etmişdir.
Bölmənin digər xəbərləri
