RƏQABƏTƏ DAVAM GƏTİRMƏK ÜÇÜN NİZAMNAMƏ KAPİTALI ARTIRILMALIDIR
Maliyyə naziri Samir Şərifov AZƏRTAC-a bildirmişdir ki, yerli sığorta şirkətlərinin daxilində olan xarici kapitalın qarşısında qoyulmuş mövcud məhdudiyyətlər yeni qanunvericiliklə aradan qaldırılmışdır.
Əvvəllər sığorta şirkətinin daxilində xarici kapital 49 faizdən çox ola bilməzdi. Hər bir sığorta şirkətində Azərbaycan kapitalının payı üstünlük təşkil edirdi. Yeni qanunla bu məhdudiyyət aradan qaldırılmışdır. Yəni artıq 100 faizlik xarici kapitalla da sığorta şirkəti yaradıla bilər. Eyni zamanda, yerli sığorta şirkətlərinin inkişafını təmin etmək məqsədi ilə məcmu sığorta sisteminin kapitalında xarici kapitalın iştirak payı üzrə məhdudiyyət qoyulacaqdır. Bununla da biz Azərbaycan sığorta şirkətlərinə rəqabətədavamlı mövqe tutmaq imkanı yaradırıq.
Lakin yerli sığorta şirkətlərinin rəhbərləri də bilməlidirlər ki, rəqabətə davam gətirmək üçün, ilk növbədə, nizamnamə kapitallarını artırmalıdırlar.
