RƏŞAD ƏHMƏDOV DÜNYA TAEKVONDO FEDERASİYASININ REYTİNQ CƏDVƏLİNDƏ BEŞİNCİ YERİ TUTMUŞDUR
Bakı, 12 oktyabr (AZƏRTAC ). Dünya Taekvondo Federasiyası (WKF) bu idman təşkilatının rəsmi yarışlarında çıxış etmiş idmançıların reytinq cədvəlini dərc etmişdir. Bu reytinqə zaçot xalları olan bütün idmançılar daxil edilmişlər. Reytinq hər bir zaçot yarışlarından sonra təzələnəcəkdir. Turnirlərin yekunlarına görə, Azərbaycan taekvondoçuları arasında ən yaxşı nəticəni Rəşad Əhmədov (80 kq) göstərmişdir. O, reytinqdə 5-ci yeri tutmuşdur. Dünyanın ən yaxşı taekvondoçularının ilk onluğuna Azərbaycan idmançıları Samir Aydınov (58 kq), Rövşən Məmmədov (63 kq), İlkin Şahbazov (68 kq) və Təvəkkül Bayramov (87 kq) da daxildirlər.
Digər təmsilçilərimiz Arzu Bağırova, Nigar Hacıyeva (hər ikisi 53 kq), Aygül Əliyeva, Nübər Hacıyeva (hər ikisi 46 kq), Aygül Abdullayeva, Şəfiqə Kərgər (hər ikisi 49 kq), Zahid Məmmədov (54 kq), Günay Ağakişiyeva (62 kq), Yelena Abbasova (67 kq) və Ramin Əzizov (80 kq) müxtəlif yerləri tutmuşlar.
Qeyd edək ki, oktyabrın 14-19-da Kopenhagendə taekvondo üzrə dünya çempionatı keçiriləcəkdir. Ölkəmizi yarışlarda 12 idmançı təmsil edəcəkdir.
Bölmənin digər xəbərləri
