Rəşad Sadıqov: Kubokun finalı avrokuboklar yolunda bizim üçün son şansdır VİDEO

12.05.2026 [18:55]
Çap et
A⁺ A^-

Bakı, 12 may, AZƏRTAC

Sabah bizi olduqca önəmli qarşılaşma gözləyir. Yaxşı və baxımlı oyun göstərmək istəyirik.

AZƏRTAC xəbər verir ki, bu sözləri “Zirə”nin baş məşqçisi Rəşad Sadıqov Azərbaycan Kubokunun finalında “Sabah” ilə keçiriləcək görüşdən öncə təşkil olunmuş mətbuat konfransında deyib.

O, komandada müəyyən qədər yorğunluğun olduğunu söyləyib: “Könül istərdi ki, matça hazırlaşmağa daha çox vaxtımız olsun. Çox stressli oyunlar keçirdik. Sabah 40-cı gün olacaq ki, 9-cu oyunumuza çıxacağıq. Premyer Liqada “İmişli” ilə səfərdə ağır görüş keçirdik. Komandamızda müəyyən problemlər var. Yaxşı məşqçi və futbolçu heyətinə malik komandaya qarşı oynayacağıq. Əlimizdən gələnin ən yaxşısını edib qalib olmağa çalışacağıq. Hədəflərimiz var və çalışacağıq ki, ilk dəqiqələrdən meydanda özümüzü yaxşı tərəfdən göstərə bilək”.

Mütəxəssis “Zirə”nin kubokun finallarında hər zaman güclü komandalarla üz-üzə gəldiyini söyləyib: “Daha əvvəl kubokun finalında “Qarabağ” kimi güclü kollektivlə qarşılaşmışdıq. “Sabah”ın da gücünə bələdik. Rəqib komandanın baş məşqçisi karyerasında 9 titul qazanıb. Kifayət qədər təcrübəli mütəxəssisdir. Ona və ustalığına böyük hörmətim var. Sevinirəm ki, çempionatımızda belə məşqçilər var. Bu mövsüm də çempionatın qalibi olublar. Bizim itirəcək çox şeyimiz var. Bu baxımdan “Sabah”la görüş avrokuboklar yolunda bizim üçün son şansdır”.

Onun sözlərinə görə, finalda məğlub olmaları 4 komandaya müsbət təsir edir: “Bu amil bizə xüsusi motivasiya vermir, ya da bizə pis təsir etmir. Bu barədə futbolçularımızla da söhbət etmişik. Belə situasiya yaranıb ki, məğlub olmağımız 4 komandaya sərf edir. Amma biz öz oyunumuza köklənmişik və qələbə qazanmaq istəyirik”.

R.Sadıqov penaltilər seriyasına hazırlaşdıqlarını vurğulayıb: “Biz də istərdik ki, oyunun taleyi ilk 90 dəqiqədə həll olunsun. Amma penaltilər seriyasına getmək hər bir halda bizim üçün uğurlu nəticə hesab oluna bilər. Rəqib komandanın baş məşqçisi penaltilər seriyasına hazırlaşmadıqlarını bildirib. Onun yerində olsaydım, mən də belə düşünərdim. Sabahkı nəticədən asılı olmayaraq, futbolçularıma indiyədək göstərdikləri əzmkarlığa görə təşəkkür edirəm və onlarla qürur duyuram”.

Qeyd edək ki, mayın 13-də “Palms Sports Arena”da keçiriləcək final oyunu saat 20:00-da start götürəcək.

_{Operator - Şövqi Əzizov}