Respublika Gününün Ağdamda qeyd olunması ümummilli məsələnin ən yeni təsdiq tarixidir
Bakı, 1 iyun, AZƏRTAC
28 May - Respublika Günü Azərbaycan tarixində nə qədər önəmli bir gündürsə, Prezident İlham Əliyevin məhz həmin gün Ağdama reallaşdırılan səfəri də bir o qədər vacib və tarixi əhəmiyyətə malik hadisədir. Prezident İlham Əliyevin işğaldan azad edilmiş torpaqlara səfəri o ərazilərin azad olunduğu gün, tarix qədər coşqulu, qürurverici hadisə olmaqla yanaşı, həm də dünyaya Azərbaycan xalqının bir daha əzmini və Vətən sevgisini sübut edən bir hadisə və mesajdır. Prezident İlham Əliyevin Ağdama budəfəki səfərinin məna yükü isə daha dərin, daha anlamlı idi. Belə ki, dövlətimizin başçısının özünün də ifadə etdiyi kimi, bu mərasim, bu görüş üçün başqa vaxt da müəyyən oluna bilərdi. Lakin məhz Respublika Gününü Ağdam şəhərində qeyd etmək Azərbaycan xalqının və Liderinin dövlətçilik tarixinə göstərdiyi hörmət onun nə qədər dərin köklərə və milli kimliyə bağlı olmasının ən bariz nümunəsidir. Azərbaycan xalqının malik olduğu bu qürur və tarixi reallıqlar fonunda isə ermənilər 30 il ərzində dövlət qura bilmədilər. Azərbaycan Prezidenti də qeyd etdiyi kimi, deməli, bu xalq dövlət qura bilmir, ancaq başqa böyük dövlətlərin çərçivəsində yaşaya bilir. 1918-ci ildə Şərqdə ilk demokratik respublika quran xalq isə 2020-ci ildə XXI əsrin müharibə tarixində misli görünməmiş Zəfər əldə etdi. Müharibə dövründə bir gün də olmadı ki, Azərbaycan əsgəri geriyə addım atsın. Müharibə zamanı elə bir gün olmadı ki, Azərbaycan xalqının yumruğu yumşalsın, açılsın, sarsılsın. Azərbaycan xalqı Prezident İlham Əliyevin ətrafında yumruq kimi hər gün daha da sıx birləşir, bütün dünyaya Vətən yolunda sinəsini sipər etməyin nə demək olduğunu göstərirdi. Tarix boyu isə elə bir gün olmadı ki, düşmən nifrət siyasətindən əl çəksin, Azərbaycan xalqının mədəni irsini bu torpaqlardan silmək məqsədindən, fikrindən daşınsın.
Bunu AZƏRTAC-a açıqlamasında politoloq Şəbnəm Həsənova bildirib.
Politoloq qeyd edib ki, Ağdam səfəri adını Azərbaycan tarixinə qızıl hərflərlə yazdıran və ən əsası mənsub olduğu xalqın dərin, səmimi, əvəzsiz və bir o qədər də sonsuz sevgisini, hörmətini və rəğbətini qazanan Müzəffər Ali Baş Komandan İlham Əliyevin ən qürurlu, parlaq, həm də xalqımızın ən gözəl adət-ənənələrindən biri olan ağsaqqallara, ictimai xadimlərə, sənətkarlara ehtiramının əyani sübutu idi. Səfərin ana xətti Ağdam şəhərinin Baş Planını məhz ağdamlılarla təsdiq etmək, təməlqoyma mərasimini məhz onlarla keçirmək idisə, onların xeyir-duası və qəlblərində kök salan ən dərin, bəlkə də ən əlçatmaz arzusunu reallaşdıran Prezident İlham Əliyevin güclü və müdrik bir Sərkərdə kimi tarixi missiyasının təsdiqi, həm də onun insan olaraq ən nəcib hisslərinin, xalqına sevgisinin təmiz və şəffaf aynası idi.
Politoloq qeyd edib ki, Şərqdə ilk demokratik respublikanı quran xalq XX əsrin sonlarında səriştəsiz idarəçilik səbəbindən torpaq itkisinə məruz qalmışdısa, bu gün o xalq Prezident İlham Əliyevin müdrik rəhbərliyi, əzmi, təmkini sayəsində müstəqil siyasət yürüdən və torpaqlarını düşmən tapdağından ləyaqətlə azad edən bir dövlətdir. Bu, həm də dövlətimizin başçısının verdiyi hər vədi yerinə yetirməsinin bariz nümunəsidir. Çünki Müzəffər Ali Baş Komandanın özü də ifadə etdiyi kimi, Ağdamdan olan məcburi köçkünlərlə dəfələrlə görüşlər əsnasında deyirdi ki, torpaqlarımız, Ağdam şəhəri və bütün rayon azad olunandan sonra daha da gözəl şərait yaradılacaq. Hələ işğal dövründə Ağdam rayonunun inkişafı ilə bağlı çox ciddi addımlar atılmışdısa, bundan sonra görüləcək hər bir tədbir dədə-baba yurdumuzda qurulacaq evlərin təməl daşları olacaq.
“Bəli, dövlətimizin başçısının Ağdama səfər etdiyi gün xalqının milli maraqlarını atdığı hər addımda əsas prioritet kimi müəyyənləşdirən bir Prezidentin sözünün təsdiqidir. Dövlətimizin başçısı da ifadə etdiyi kimi, Azərbaycan bu məsələnin sülh yolu ilə həlli üçün əlindən gələni etdi. Bu zaman kəsiyində isə işğalçını dəstəkləyən dairələr ona nə hüquqi, nə də siyasi təzyiq göstərmədilər. Əksinə, Azərbaycan xalqının mədəni abidələri, mədəni sərvəti dağıdıldı. Xalqımız doğma-yurd yuvasına dönərkən daş üstündə salamat bir daş tapmadı. Azərbaycan xalqı istər müharibə dövründə, istərsə də ondan sonra atdığı bütün addımları ləyaqətlə atıb, mülki insanlara əl qaldırmayıb. Azərbaycanın Lideri dəfələrlə bəyan edib ki, torpağımızda ikinci erməni dövlətinin yaradılmasına imkan verilməyəcək. Bu, belə də oldu. Düşmənin və onu dəstəkləyən məkrli qüvvələrin bu siyasəti də məhv edildi. Hazırkı reallığı dəyərləndirərkən əminliklə deyə bilirik ki, Azərbaycan təkcə torpaqlarını azad etmədi, həm də bölgəni siyasi oyunlarının meydanına çevirmək istəyən oyunbazların planını məhv etdi. Əfsuslar olsun ki, bu gün Ermənistan tərəfi təxribatçı əməllərindən yenə də əl çəkmir. Lakin Azərbaycan xalqının iradəsi, onun Liderinin “dəmir yumruğ”u hələ də yerindədir. Bunu həm Ermənistan, həm də ona havadarlıq etməyə çalışan bütün dairələr bilməlidir. Biz bu gün sərhədlərimizi bərpa edirik və edəcəyik”, - deyə Ş.Həsənova qeyd edib.
Politoloq deyib ki, torpaqlarımızın işğaldan azad edilməsi ümummilli məsələdir, Prezident İlham Əliyev bu ümummilli məsələnin öndə gedən bayraqdarı, Respublika Gününün isə məhz Ağdamda qeyd olunması bu məsələnin ən yeni təsdiq tarixidir.
Bölmənin digər xəbərləri
