Respublika Veteranlar Təşkilatında Zəfər Günü qeyd olunub
Bakı, 4 noyabr, AZƏRTAC
8 Noyabr - Zəfər Gününün 4-cü ildönümü münasibətilə Müharibə, Əmək və Silahlı Qüvvələr Veteranları Təşkilatının üzvləri, sədr polkovnik Cəlil Xəlilovun rəhbərliyi ilə Fəxri xiyabanı ziyarət edərək Ulu Öndər Heydər Əliyevin məzarı önünə əkil qoyublar.
Sonra akademik Zərifə Əliyevanın məzarı və Şəhidlər xiyabanı ziyarət olunub.
AZƏRTAC xəbər verir ki, tədbir Müharibə, Əmək və Silahlı Qüvvələr Veteranları Təşkilatının inzibati binasında davam edib.
Müharibə, Əmək və Silahlı Qüvvələr Veteranları Təşkilatı, “Modern Ailə və İnkişaf” İctimai Birliyi və “Dayaq” Vətən Müharibəsi Əlillərinə və Şəhid Ailələrinə Dəstək Təşkilatı tərəfindən birgə keçirilən tədbirdə Azərbaycanın Dövlət Himni səsləndirilib, Ümummilli Lider Heydər Əliyevin və şəhidlərimizin xatirəsi bir dəqiqəlik sükutla yad olunub.
Müharibə, Əmək və Silahlı Qüvvələr Veteranları Təşkilatının sədri polkovnik Cəlil Xəlilov tədbirdə çıxış edərək Zəfər Gününün tarixi əhəmiyyətindən, Silahlı Qüvvələrimizin Vətən müharibəsində göstərdiyi qəhrəmanlıqlardan danışıb: “Zəfər Günü Azərbaycanın dövlətçilik tarixində müstəsna əhəmiyyət kəsb edir. Bu Qələbənin nəticəsi regionda və dünyada baş verən hadisələrə ciddi təsir göstərdi, qlobal aləmdə yeni status-kvo formalaşdırdı. Bu Zəfər bütün anti-Azərbaycan qüvvələrinə göstərdi ki, xalqımız hər cür təhlükəni dəf etməyə qadirdir və öz torpağının bir qarışından belə imtina etməyəcək. 44 günlük Vətən müharibəsində Müzəffər Ali Baş Komandan İlham Əliyevin rəhbərliyi ilə Azərbaycan Ordusu böyük qəhrəmanlıq göstərdi. Təsadüfi deyil ki, hazırda da Rusiya, ABŞ, Çin kimi nəhəng dövlətlər Vətən müharibəsini, ordumuzun bu müharibədə tətbiq etdiyi taktikanı diqqətlə öyrənməkdədir”.
“Modern Ailə və İnkişaf” İctimai Birliyinin sədri Zərifə Quliyeva Zəfər Gününün tarixi önəminə toxunub: “Bu Qələbə nəticəsində biz ərazi bütövlüyümüzlə yanaşı, milli qürurumuzu da bərpa etdik. Biz bütün dünyaya nümayiş etdirdik ki, Azərbaycan məğlubedilməzdir və hər zaman da belə olacaq. Bu böyük Qələbənin müəllifi isə Müzəffər Ali Baş Komandanımız, Silahlı Qüvvələrimiz, şəhidlərimiz və veteranlarımızdır”.
Tədbirdə çıxış edən Milli Məclisin deputatı Mehriban Vəliyeva ölkəmizin inkişafında, güclü ordunun formalaşmasında Ulu Öndər Heydər Əliyevin həyata keçirdiyi tədbirlərdən danışıb. O qeyd edib ki, məhz Ümummilli Lider tərəfindən əsası qoyulan milli inkişaf siyasəti, nizami ordunun formalaşdırılması sonrakı dönəmdə Prezident İlham Əliyev tərəfindən uğurla inkişaf etdirilib, nəticə etibarilə 8 Noyabr - Zəfər Gününün ortaya çıxmasını şərtləndirib.
Digər çıxış edənlər də şəhidlərimizə, veteranlarımıza, Ordumuza sevgi və ehtiramlarını bildiriblər.
Sonda vətənpərvərlik tərbiyəsinin təbliğindəki xidmətlərinə görə fərqlənən veteranlar Müharibə, Əmək və Silahlı Qüvvələr Veteranları Təşkilatı tərəfindən fəxri fərmanla təltif ediliblər.
Bölmənin digər xəbərləri
