RESPUBLİKA XATİRƏ KİTABI REDAKSİYASININ YENİ NƏŞRLƏRİ
“Xatirə kitabı”nın yenidən işlənmiş birinci cildi latın qrafikası ilə yüksək poliqrafik səviyyədə çapdan çıxmışdır. İri formatlı, 800 səhifəlik bu cilddə İkinci Dünya Müharibəsində, məhəlli münaqişələrdə, qanlı Yanvar hadisələrində, eləcə də Ermənistan-Azərbaycan, Dağlıq Qarabağ münaqişəsində həlak olmuş, itkin düşmüş, soyadı “A” hərfi ilə başlayan 16 min nəfərə yaxın Azərbaycan vətəndaşı haqqında məlumat verilmişdir.
İlin sonuna kimi bu çoxcildliyin ikinci cildi də işıq üzü görəcəkdir. İkinci cildə soyadı “B, C, Ç” hərfləri ilə başlayan, xatirəsi hər birimiz üçün əziz olan minlərlə həmvətənimizin adları daxil edilir.
Azərbaycan Respublikasının Prezidenti Heydər Əliyevin xüsusi diqqət və qayğısı sayəsində nəşr edilən, ümumi həcmi 1200 çap vərəqi olacaq Xatirə kitabının son 20-ci cildi 2015-ci ildə - faşist Almaniyası üzərində tarixi qələbənin 70 illiyi günlərində oxuculara çatdırılacaqdır.
“Xatirə kitabı” redaksiyası “Azərbaycan harayı” adlı iri həcmli poeziya antalogiyasını da çap etmişdir. Kitaba Mirvari Dilbazi, Hüseyn Arif, Nəbi Xəzri, Məmməd Araz, Xəlil Rza, Qabil, Nəriman Həsənzadə, Cabir Novruz, Fikrət Qoca və Musa Yaqubun şer və poemaları daxil edilmişdir.
Kitaba ön sözü xalq şairi Bəxtiyar Vahabzadə yazmışdır.
Bölmənin digər xəbərləri
