RESPUBLİKAMIZA MƏHSULDAR CİNS MAL-QARA GƏTİRİLƏCƏKDİR
Heyvandarlıq sahəsində məhsuldarlığın artırılması üçün respublika Prezidentinin imzaladığı müvafiq Sərəncamın icrası ilə əlaqədar yaxın günlərdə respublikamıza cins mal-qara gətiriləcəkdir.
Bu barədə AZƏRTAC-a Samux Ərazi Kənd Təsərrüfatı İdarəsinin rəisi Ziyad Abbasov məlumat vermişdir. O demişdir ki, ölkəmizdə aqrar sektorun inkişafı ilə əlaqədar həyata keçirilən proqramın tərkib hissəsi olan bu layihə heyvandarlığın baş sayına görə deyil, məhsuldar cins mal-qara hesabına inkişaf etdirilməsini nəzərdə tutur. Kənd təsərrüfatının dirçəldilməsi üzrə proqramın ilk hissəsi ölkəyə yüksək reproduksiyalı toxumların, gübrələrin gətirilməsi ilə başlanmışdır. Ümumilikdə bu məqsədlər üçün ölkə rəhbərinin ehtiyat fondundan ayrılmış 25 milyon manat vəsaitin 3 milyonu maldarlığın inkişafına xərclənəcəkdir.
Cins mal-qaranın gətirilməsinə yaxın günlərdə başlanacaqdır. Hazırda fermalarda həmin mal-qaranın saxlanılacağı şərait nəzərdən keçirilir.
Bölmənin digər xəbərləri
