RESPUBLİKANIN DAXİLİ İŞLƏR ORQANLARI ÖTƏN İL ÜZƏRLƏRİNƏ DÜŞƏN VƏZİFƏLƏRİ LAYİQİNCƏ YERİNƏ YETİRMİŞLƏR
Daxili işlər naziri, general-polkovnik Ramil Usubov hesabat məruzəsində qeyd etmişdir ki, ümummilli liderimiz Heydər Əliyevin təməlini qoyduğu geniş islahatlar kursu Prezident İlham Əliyev tərəfindən ötən ildə də müvəffəqiyyətlə davam etdirilərək ölkəmizin iqtisadi qüdrətini əhəmiyyətli dərəcədə gücləndirmiş, beynəlxalq nüfuzunu artırmışdır. Sosial tərəqqiyə, regionların inkişafına, insan hüquq və azadlıqlarının yüksək səviyyədə təminatına xidmət edən kompleks tədbirlər görülmüşdür.
Nazir vurğulamışdır ki, ötən il Azərbaycanda ümumi daxili məhsulun artımı 26 faiz təşkil etmişdir ki, bu da dünyada oxşarı olmayan bir göstəricidir.
2005-ci il həm də dövlətçiliyimizin, müstəqilliyimizin daha da möhkəmlənməsi, ictimai-siyasi sabitliyin və asayişin etibarlı qorunması ilə də əlamətdar olmuşdur. Dövlət quruculuğu sahəsində ölkədə aparılan mütərəqqi islahatlar daxili işlər orqanlarının fəaliyyətinə müsbət təsir göstərmiş, nazirlikdə, onun ərazi orqanlarında və nizami hissələrində idarəçilik və təşkilatçılıq fəaliyyətinin, nəzarət mexanizminin, normativ-hüquqi bazanın müasir tələblər baxımından təkmilləşdirilməsinə xüsusi önəm verilmişdir. Daxili təhlükəsizliyin möhkəmləndirilməsi, şəxsi heyətin peşə hazırlığı səviyyəsinin yüksəldilməsi məqsədi ilə əlavə tədbirlər görülmüş, qanunçuluğa, xidməti, icra uçot-qeydiyyat intizamına riayət edilməsinə tələbkarlıq artırılmışdır.
Ramil Usubov bildirmişdir ki, daxili işlər orqanları əvvəlki illərdə olduğu kimi, hesabat dövründə də üzərinə düşən vəzifələri layiqincə yerinə yetirmiş, vətəndaşların əmin-amanlıq şəraitində yaşaması üçün sabitlik və asayiş etibarlı şəkildə qorunmuşdur. Azərbaycan Respublikasının Prezidenti İlham Əliyevin təşəbbüsü ilə 2004-cü il iyunun 30-da qəbul olunmuş “Azərbaycan Respublikasında polis orqanlarının fəaliyyətinin təkmilləşdirilməsinə dair” Dövlət Proqramının yerinə yetirilməsi sahəsində tədbirlər uğurla davam etdirilmişdir. Şəxsi heyətin sosial müdafiəsinin yaxşılaşdırılması məqsədi ilə əmək haqlarının artırılması işinin davamı olaraq, Azərbaycan Prezidentinin 2005-ci il 31 avqust tarixli Sərəncamına əsasən Daxili İşlər Nazirliyinin bəzi qurumlarının əməkdaşlarının vəzifə maaşları orta hesabla 5-6 dəfə artırılmışdır. Həmin Dövlət Proqramı son illər ərzində Daxili İşlər Nazirliyi sistemində müxtəlif təyinatlı yeni obyektlərin istismara verilməsini, bir çox obyektlərin isə əsaslı surətdə yenidən qurulmasını da reallaşdırmışdır. Hesabat dövründə həmin məqsədlər üçün ayrılmış 23,4 milyard manat maliyyə vəsaitindən balans dəyəri 17,3 milyard manat olan 12 obyekt istismara verilmiş, miqrasiya xidmətinin inzibati binasının, xüsusi sığınacağın və Bərdədə hərbi hissənin tikintisi isə davam etdirilir. Ötən il vətəndaşların qəbulu və onların müraciətlərinə baxılmasına da ciddi diqqət yetirilmişdir.
Ramil Usubov daha sonra bildirmişdir ki, beynəlxalq əməkdaşlıq sahəsində çoxtərəfli, regional və ikitərəfli səviyyələrdə görülən işlər uğurlu olmuşdur. İnsan alveri, çirkli pulların yuyulması, terrorçuluq, qaçaqmalçılıq və transmilli cinayətkarlığın digər təzahürləri ilə mübarizə, habelə əməliyyat-xidməti fəaliyyətin müxtəlif yönümləri üzrə MDB və başqa xarici dövlətlərin hüquq mühafizə orqanları ilə əməkdaşlıq əlaqələri daha da möhkəmlənmişdir. Ötən il nazirliyin rəhbərliyi tərəfindən ölkəmizdəki diplomatik korpusun, xarici dövlətlərin və beynəlxalq təşkilatların nümayəndələri ilə 35-dən çox işgüzar görüş keçirilmişdir.
Daxili İşlər naziri onu da diqqətə çatdırmışdır ki, hesabat dövründə 17 min 243 cinayət hadisəsi qeydə alınmışdır. Əhalinin hər 100 min nəfərinə düşən cinayətlərin sayı 206 fakt olmuşdur ki, bu da MDB məkanında ən yaxşı göstəricilərdən biridir.
Cinayətlərin strukturunda qəsdən adam öldürmələr 4,5, quldurluq 3,5, hədə-qorxu ilə tələbetmələr 21,3 faiz azalmışdır. Bununla belə cinayətlərin bəzi növləri, o cümlədən böyük ictimai təhlükə törətməyən döymə hadisələri, oğurluq halları artmış, narkotik vasitələrin qanunsuz dövriyyəsi və insan alveri ilə əlaqədar daha çox cinayət aşkarlanmışdır. Cinayətlərin açılması işi 2005-ci ildə də diqqət mərkəzində saxlanılmış, mövcud vəziyyət mütəmadi təhlil edilərək zəruri tədbirlər görülmüşdür. Bu baxımdan, əməliyyat şəraitinə təsiri olan, geniş ictimai rezonans doğurmuş ağır və xüsusilə ağır cinayətlərin açılması məqsədi ilə mərkəzi aparatın müvafiq xidmətləri tərəfindən ərazi polis orqanlarına konkret əməli kömək göstərilmişdir.
Hesabat ilində daxili işlər və prokurorluq orqanlarında istintaq edilən cinayətlərin 92,3 faizinin açılması təmin edilmişdir. 2004-cü ilə nisbətən ötən il şəxsiyyət əleyhinə olan cinayətlərin, o cümlədən qəsdən adamöldürmə cinayətlərinin açılması daha da yaxşılaşmış, adamları girov götürmə və banditizim cinayətlərinin isə hamısının üstü açılmışdır.
Uğurlarla yanaşı, nöqsanlardan da danışan general-polkovnik Ramil Usubov demişdir ki, kriminogen durumun təhlili 2005-ci ildə cinayətkarlıqla mübarizə və ictimai asayişin mühafizəsi sahəsində əldə edilmiş nailiyyətlərlə yanaşı, ayrı-ayrı orqan və hissələrin işində çatışmazlıqlar da mövcud olmasını, cinayətlərin qarşısının alınması və açılması məqsədi ilə həyata keçirilən profilaktik və istintaq-əməliyyat tədbirləri bəzi hallarda lazımi səmərə verməmişdir.
Daxili işlər naziri, həmçinin yol-nəqliyyat qəzalarının sayının artdığını da təəssüf hissi ilə söyləmişdir.
Hesabat məruzəsinin müzakirəsində Daxili Qoşunların komandanı, general-leytenant Zakir Həsənov, Naxçıvan MR daxili işlər naziri, daxili xidmət general-mayoru Əhməd Əhmədov, Bakı Şəhər Baş Polis İdarəsinin rəisi, polis general-leytenantı Məhərrəm Əliyev, Baş Dövlət Yol Polisi idarəsinin rəisi, polis general-mayoru Ramiz Zeynalov və başqaları çıxış etmişlər.
Kollegiya iclasına yekun vuran daxili işlər naziri, general-polkovnik Ramil Usubov iştirakçılar adından Azərbaycan Respublikasının Prezidenti, Silahlı Qüvvələrin Ali baş komandanı İlham Əliyevi əmin etmişdir ki, daxili işlər orqanlarının şəxsi heyəti ölkəmizin tərəqqisi, xalqımızın rifahının yüksəldilməsi və xoşbəxt gələcəyi naminə üzərinə düşən vəzifələri layiqincə yerinə yetirərək, ictimai asayişin, hüquq qaydalarının keşiyində bundan sonra da ayıq-sayıq dayanacaqdır.
Bölmənin digər xəbərləri
