MƏDƏNİYYƏT
“RƏSUL RZA” MÜKAFATI TƏQDİM OLUNMUŞDUR
Mayın 17-də Azərbaycan Yazıçılar Birliyində “Rəsul Rza” mükafatının təqdim olunma mərasimi keçirilmişdir.
Mərasimi Azərbaycan Yazıçılar Birliyinin katibi, xalq şairi Fikrət Qoca açaraq, XX əsr Azərbaycan ədəbiyyatının görkəmli nümayəndəsi, xalq şairi Rəsul Rzanın çoxcəhətli yaradıcılığından və onun tarixi xidmətlərindən söhbət açdı, “Rəsul Rza” mükafatına layiq görülmüş ədəbiyyat, mədəniyyət və elm xadimlərini təbrik etdi.
Sonra tarix elmləri doktoru, professor, Milli Məclisin deputatı Yaqub Mahmudova, “Ulduz” jurnalının baş redaktoru, şair Ələkbər Salahzadəyə, Şair Tofiq Abdinə, Yazıçılar Birliyinin katibi Arif Əmrahoğluna, Birliyin üzvü Teyyub Qurbana və naşir Nadir Məmmədliyə “Rəsul Rza” mükafatını və görkəmli şairin nəfis şəkildə nəşr olunmuş 5 cildliyi təqdim olundu.
Mükafata layiq görülənlər mərasimdə çıxış edərək R.Rzanın şəxsiyyəti, vətənpərvərliyi və xeyirxahlığı ilə bağlı öz təəssüratlarını söylədilər, bu mükafatı çox yüksək dəyərləndirdiklərini vurğuladılar.
Rəsul Rzanın oğlu Azərbaycan Yazıçılar Birliyinin sədri, Milli Məclisin deputatı Anar mükafat alanları təbrik edərək, atasının xatirəsini əziz tutduqlarına görə bütün tədbir iştirakçılarına öz təşəkkürünü bildirdi.