Ri Yonq-ho: Honkonq məsələsi Çinin daxili işidir, xarici qüvvələr müdaxilə etməməlidir
Pekin, 3 sentyabr, AZƏRTAC
Honkonq məsələsi Çinin daxili işidir, xarici qüvvələr bu işə müdaxilə etməməlidirlər.
AZƏRTAC Çinin Xarici İşlər Nazirliyinə istinadla xəbər verir ki, bu sözləri Koreya Xalq Demokratik Respublikasının (KXDR) xarici siyasət idarəsinin rəhbəri Ri Yonq-ho Pxenyanda çinli həmkarı Van İ ilə görüşdə deyib. KXDR rəsmisi ölkəsinin Çinin "Bir ölkə, iki sistem" prinsipini qoruyub saxlamaq və ərazi bütövlüyünü müdafiə etmək üçün atdığı bütün addımları tam dəstəklədiyini bildirib.
Çinin Xarici İşlər naziri Van İ Honkonqda baş verən son hadisələrlə bağlı ölkəsinin mövqeyi və atılan addımlar barədə KXDR tərəfini məlumatlandırıb.
Nazirlər iki ölkə arasında əlaqələrin inkişafı ilə bağlı məsələləri müzakirə ediblər. Qeyd olunub ki, iki ölkənin liderlərinin son dövrlər 5 dəfə görüşməsi Çin-KXDR ənənəvi dostluq münasibətlərinin dərinləşməsində mühüm rol oynayıb.
Görüşdə Koreya yarımadasında vəziyyətə dair fikir mübadiləsi aparılıb, iki ölkənin bu məsələ ilə əlaqədar məlumat mübadiləsini davam etdirməsinə dair razılıq əldə olunub.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
