“RİA NOVOSTİ” AGENTLİYİ BAKIDA DAİMİ NÜMAYƏNDƏLİYİNİ AÇACAQ
Agentliyin MDB və Baltikyanı ölkələr üzrə Baş müdiriyyətinin rəhbəri Alan Kasayevin sözlərinə görə, Azərbaycan əməkdaşlıq baxımından maraqlı ölkədir və agentliyin informasiya mübadiləsi sahəsində onunla birgə fəaliyyət göstərmək planları var.
Kasayev demişdir: “Azərbaycan bizə həm də ona görə yaxındır ki, ölkələrimiz arasında dövlət səviyyəsində ciddi ixtilaflar yoxdur. Bundan əlavə, Azərbaycan təkcə Cənubi Qafqazda deyil, həm də dünyada, o cümlədən Yaxın və Orta Şərqdə bərqərar olan siyasi vəziyyətlə əlaqədar mühüm ölkədir. Prezidentlərimizin etimada əsaslanan şəxsi münasibətləri burada heç də az rol oynamır. Azərbaycandakı vəziyyəti müsbət qiymətləndirərək, biz bu ölkə ilə Rusiyanın informasiya məkanındakı münasibətlərini keyfiyyətcə yeni səviyyəyə qaldırmaq niyyətindəyik”. Kasayev əlavə etmişdir ki, belə əməkdaşlıq artıq gerçəkləşdirilmişdir. Məsələn, Azərbaycanda çıxan “Obozrevatel” qəzeti ilə birlikdə “Novosti”nin rusdilli oxucuları üçün əlavə vərəq buraxılır. “Novosti”nin Azərbaycanda nümayəndəliyinin açılması isə informasiya əməkdaşlığını möhkəmləndirməyə imkan verəcəkdir. Bakıda nümayəndəliyin açılması ideyası Azərbaycanda Rusiya ilinin keçirilməsi ilə üst-üstə düşmüşdür.
Nümayəndəliyin yaradılması işi bu ilin birinci yarısında başa çatacaqdır. May-iyun aylarında “Novosti” AZƏRTAC-la birlikdə agentliyin ən yaxşı fotoqraflarının fotosərgisini təşkil etməyi planlaşdırır. Hər iki ölkənin politoloqları və jurnalistlərinin iştirakı ilə dəyirmi masa təşkil etmək də nəzərdə tutulmuşdur. Nümayəndəlik, əsasən, əlaqələndirici qurum kimi işləyəcək, informasiya toplamaq, mətbuatı izləmək, Rusiya mətbuatının Azərbaycan, Azərbaycan mətbuatının Rusiya haqqında nə yazdığı barədə materiallar hazırlamaqla, onlayn rejimində informasiya mübadiləsi ilə məşğul olacaqdır.
