Rumıniyada “Heydər Əliyev Kuboku-2014” mini futbol turniri keçirilmişdir VİDEO
Buxarest, 9 may (AZƏRTAC). Ümummilli lider Heydər Əliyevin anadan olmasının 91-ci ildönümü münasibətilə Azərbaycan Respublikası Dövlət Neft Şirkətinin (ARDNŞ) Rumıniya nümayəndəliyinin təşkilatçılığı ilə Buxarestin Herestrau parkında “Heydər Əliyev Kuboku-2014” mini futbol turniri keçirilmişdir.
Turnirin açılış mərasimində Rumıniya parlamentinin Deputatlar Palatasının sənaye və xidmətlər komitəsinin sədri, Rumıniya-Azərbaycan parlamentlərarası dostluq qrupunun rəhbəri Yulian Yanku, Azərbaycanın və Türkiyənin səfirliklərinin, Türk İş Adamları Dərnəyinin, Azərbaycan-Rumıniya Gənclər və Mədəniyyət Assosiasiyasının və ARDNŞ-in Rumıniyadakı nümayəndəliyinin əməkdaşları iştirak etmişlər.
Nümayəndəliyin rəhbəri Həmzə Kərimov çıxış edərək ümummilli lider Heydər Əliyevin Azərbaycan-Rumıniya münasibətlərinin formalaşması və inkişafı istiqamətində gördüyü işlərdən danışmışdır. Rumıniyada “Heydər Əliyev Kuboku” mini futbol turnirinin keçirilməsinin artıq ənənəyə çevrildiyini bildirən H.Kərimov belə yarışların Avropanın müxtəlif ölkələrində də təşkil olunduğunu diqqətə çatdırmışdır. O, yarışların təşkilinin Azərbaycan və Rumıniya gəncləri arasında münasibətlərin gücləndirilməsinə, eləcə də ölkəmizin təbliğinin daha geniş aparılmasına xidmət etdiyini demişdir.
Yulian Yanku çıxışında üç bayramın - Rumıniyanın Müstəqillik Gününün, ulu öndər Heydər Əliyevin anadan olmasının 91-ci ildönümünün, və Avropa Gününün eyni gündə qeyd edildiyini diqqətə çatdırmışdır. O bildirmişdir ki, ulu öndər Heydər Əliyevin rəhbərliyi dövründə Azərbaycan qısa müddətdə böyük uğurlara imza atmışdır. Məhz Ümummilli Liderin uzaqgörən siyasətinin Prezident İlham Əliyev tərəfindən uğurla həyata keçirilməsi nəticəsində hazırda Azərbaycan regionun ən inkişaf etmiş ölkəsinə çevrilmişdir. Heydər Əliyevin adı istər Azərbaycanda, istərsə də regionda həyata keçirilən iri layihələrin müəllifi kimi tarixə yazılmışdır.
Azərbaycanın Rumıniyadakı səfiri Fərid Abdinbəyov da artıq ənənəyə çevrilmiş və üçüncü ildir keçirilən mini futbol turnirinin təşkilinə görə ARDNŞ-in Rumıniya nümayəndəliyinə təşəkkürünü bildirmiş, idmançılara uğurlar arzulamışdır.
Rəsmi açılış mərasimindən sonra “Heydər Əliyev Kuboku-2014” mini futbol turnirinə start verilmişdir. Altı komandanın iştirak etdiyi yarış ilk dəqiqələrdən gərgin mübarizə şəraitində keçmişdir. Turnirin finalında “Styau-1” və “Styau-2” komandaları qarşılaşmışlar. Final görüşündə “Styau-1” komandası qalib gəlmişdir.
Turnirdə ilk yerləri tutan komandaların üzvlərinə medallar, fəxri fərmanlar və müxtəlif hədiyyələr təqdim edilmişdir.
İqbal Hacıyev
AZƏRTAC-ın xüsusi müxbiri
Buxarest
Bölmənin digər xəbərləri
