RUS DRAM TEATRINDA AÇIQ QAPI GÜNLƏRİ
Sentyabrin 1-də Səməd Vurğun adına Rus Dram Teatrında uşaqlar üçün Beynəlxalq Bilik gününə həsr olunmuş açıq qapı günü keçirilmişdir. Bu barədə AZƏRTAC-ın müxbirinə teatrın direktoru Marat İbrahimov xəbər vermişdir. Həmin gün gənc tamaşaçılara Boris Lukinskinin “Donuz balası Knok” pyesi əsasında tamaşa göstərilmişdir. Tamaşada artistlərdən Murad İbrahimov, Teymur Rəhimov, İsa Rəhimov, Yuri Omelçenko, Milana Mardoxanova və başqaları iştirak edirdilər.
Teatrın baş rejissoru və tamaşanın quruluşçusu, respublikanın xalq artisti Aleksandr Şarovski yeni dərs ilinin başlanması münasibətilə uşaqları təbrik edərək, onlara uğurlar arzuladı. O xatırlatdı ki, artıq 10 ildir Rus Dram Teatrı yeni mövsüm ərəfəsində belə tədbirlər keçirir.
Sonra lotereya oynanıldı və onun nəticələrinə görə beş şagird məktəb ləvazimatı dəstinin sahibi oldu.
Sentyabrın 8-də teatrda mövsümün açılışı olacaq və “Bütün ulduzlar-2“ tamaşası ilk dəfə göstəriləcəkdir. Səkkiz ildir səhnədən düşməyən “Bütün ulduzlar” tamaşası teatrsevərlər arasında çox populyar olmuşdur.
Bölmənin digər xəbərləri
