Azərbaycan Respublikası Baş nazirinin birinci müavini Abbas Abbasov
AZƏRTAC-ın müxbirinə bildirmişdir ki, Rusiya-Azərbaycan sərhədinin bağlanması müvəqqəti xarakter daşıyır. Nəzarət-buraxılış məntəqələrinin fəaliyyəti yaxın günlərdə bərpa olunacaqdır. Hazırda əsas diqqət dəmir yolu nəqliyyatı ilə sərnişin və yük daşımalarının tənzimlənməsinə yönəlib. Azərbaycan dəmir yolunun vaqon parkı, daşımaların həcmi nə qədər artırsa artsın, tələbatı ödəyəcəkdir. Dəniz yolu ilə daşımalarda heç bir problemimiz yoxdur. Əsas narahatçılıq Rusiya-Azərbaycan sərhədi yaxınlığında yaşayan vətəndaşların bir-biri ilə əlaqələrinin kəsilməsi ilə bağlıdır.
Baş nazirin müavini Rusiya Federasiyasının sərhədləri bağlamaq barədə qərarını başqa cür şərh etməyin düzgün olmadığını söyləyərək demişdir ki, bu addımın təhlükəsizlik tədbirləri ilə əlaqədar atılması başa düşüləndir. Rusiya ilə Azərbaycan arasında iqtisadi və siyasi sahədə əlaqələrin normal inkişaf etdiyini xatırladan A.Abbasov, yaranmış problemin yaxın günlərdə aradan qalxacağına əmin olduğunu demişdir.
