Rusiyanın nüfuzlu incəsənət nəşri rəqs sənətimizdən yazıb
Bakı, 30 noyabr, AZƏRTAC
Rusiyanın nüfuzlu incəsənət nəşrlərindən olan “Balet” jurnalının növbəti nömrəsində Azərbaycan Dövlət Rəqs Ansamblının fəaliyyətindən, bu kollektivin öz ikinci baharını yaşamasından bəhs edən geniş məqalə dərc olunub.
Mədəniyyət və Turizm Nazirliyindən AZƏRTAC-a bildirilib ki, “Vesna azerbaydjanskoqo tantsa” (Azərbaycan rəqsinin baharı) adlı yazıda cari ilin aprelində ilk dəfə solo konsertlə çıxış edən ansambldakı yeniliklərdən bəhs edilir. Yazıda Rusiyanın Xalq Artisti, Qafqaz və dünya rəqslərinin bilicisi, tanınmış baletmeyster Dikalu Muzakayevin rəhbərliyi altında kollektivin yeni yaradıcılıq layihələrindən, zəngin tarixi və ənənələri olan Azərbaycanın xalq rəqs sənətinin müasir şəraitdə yaşadılmasından söz açılır. Məqalədə milli rəqs sənətimizi yad elementlərdən təmizləmək, əsl Azərbaycan rəqsini dünyaya göstərmək missiyasını yerinə yetirən bəstəkar, rəssam, rəqqas və musiqiçilərdən ibarət yaradıcı komandanın uğurlu fəaliyyəti xüsusilə vurğulanır.
Eyni zamanda, yazıda milli rəqsimizin ali səhnə sənətinə çevrilməsində misilsiz xidmətləri olan görkəmli sənətkar Əlibaba Abdullayev, bu sənətin digər azman nümayəndələri xatırlanır, rəqs musiqisi yazmış, melodiyaları toplamış bəstəkarların adı çəkilir. Müəllif ilk dəfə milli rəqs melodiyaları əsasında yaradılmış “Koroğlu” baletinin özəlliklərindən bəhs edərkən bu mövzu üzərində geniş dayanaraq, rusdilli oxuculara xalq qəhrəmanına həsr olunmuş “Koroğlu” dastanının motivləri əsasında dahi Üzeyir Hacıbəylinin yazdığı opera, bu mövzuda çəkilmiş bədii film barədə də məlumat verir.
“Balet” jurnalı ildə altı dəfə (iki aydan bir) nəşr olunur. Dərgidə həm çağdaş dünya klassik və milli rəqs sənətində baş verən hadisələrə, rəqs sənəti tarixi barədə yazılara, həm də rəqs sənətinə dair elmi məqalələrə yer verilir. Dünya rəqs sənəti barədə ciddi yazıların ünvanı olan və beynəlxalq səviyyədə qəbul edilən jurnalda Azərbaycan ansamblı barədə geniş yazının dərc olunması, həm də milli incəsənətimizin təbliğinə töhfədir.
Qeyd edək ki, rəngli illüstrasiyalarla zəngin “Azərbaycan rəqsinin baharı” məqaləsinin müəllifi “Mədəniyyət” qəzetinin əməkdaşı Gülcahan Mirməmməd, fotoların müəllifi Əbdürrəhim İsrafilovdur.
Bölmənin digər xəbərləri
