“Sabah” klubundan gələcəyə 10 milyonluq investisiya: Uşaq futbolunda yeni dövr
Bakı, 8 sentyabr, AZƏRTAC
Cəmi 9 ildir yaranmasına baxmayaraq, Azərbaycan Premyer Liqasında və beynəlxalq arenada əldə etdiyi uğurlarla diqqət çəkən “Sabah” klubu bu dəfə ölkə futbolunun gələcəyinə hesablanmış strateji addımla gündəmdədir. Klub UEFA Çempionlar Liqasının liqa mərhələsinə vəsiqə qazanması münasibətilə Prezident İlham Əliyevin 27 avqust 2026-cı il tarixli Sərəncamı ilə ayrılan 5 milyon manatlıq maliyyə dəstəyinə öz vəsaitindən də eyni məbləğdə əlavə edərək, 10 milyon manatlıq "Sabah Football Academy Future Talents" proqramının təməlini qoyub. Təşəbbüs Azərbaycan uşaq futbolunda yeni mərhələnin başlanğıcı kimi qiymətləndirilə bilər.
Bu addımı fərqləndirən əsas məqam odur ki, ayrılan vəsait yalnız hazırkı ehtiyaclara deyil, uzunmüddətli və davamlı inkişafa yönəldilib. Klubun açıqlamasında da bildirildiyi kimi, məqsəd 10 milyon manatlıq ilkin kapitalı xərcləmək yox, qoruyub artırmaqdır. Yəni vəsait peşəkar şəkildə idarə olunaraq gəlir yaradacaq.
İndi futbol ictimaiyyətini bu suallar maraqlandırır: proqram necə icra olunacaq və Azərbaycan futboluna nə qazandıracaq?
Məsələ ilə bağlı AZƏRTAC-a açıqlama verən AFFA-nın Məşqçilərin maarifləndirmə şöbəsinin müdiri Aslan Kərimov təşəbbüsün Azərbaycan futbolunun gələcəyi üçün olduqca əhəmiyyətli addım olduğunu bildirib: “Bu, Azərbaycan futbol ictimaiyyəti üçün ən xoş sürprizlərdən biri oldu. Bu təşəbbüsü yalnız sevinərək qarşılamaq olar. Hesab edirəm ki, futbolun inkişafı üçün atılan ən vacib addımlardan biridir. Dünyada futbolun inkişafı ilə bağlı üç ana sütun var ki, o istiqamətlərdə inkişafa nail olmaq mümkündür: infrastruktur, kütləvilik və maariflənmə. Hesab edirəm ki, bu 10 milyon manatı klub rəhbərliyi lazımi istiqamətlərə bölüşdürəcək. Bu bölgünün düzgün aparılması isə əlbəttə ki, futbolun inkişafına böyük töhfə verəcək”.
Veteran futbolçunun sözlərinə görə, proqram çərçivəsində oyunçuların peşəkar inkişafı üçün individual yanaşma mühüm rol oynayır: “Əslində istiqamətlər çoxdur. Əlbəttə, oyunçuların peşəkar inkişafı ilə bağlı fərdi yanaşma çox vacibdir. Futbolçuların performanslarının ölçülməsi, izlənilməsi və məlumat bazasının toplanması əsas şərtlərdəndir. İnkişafdan danışırıqsa, oyunçuların istər fiziki, istərsə də texniki-taktiki baxımdan ilkin durumunu bilməliyik. Bundan sonra nə qədər artım olduğunu və onların necə inkişaf etdiyini monitorinq etmək olar. Bunun üçün də hər bir oyunçunun fərdi inkişaf planı hazırlanmalı və proses düzgün yönləndirilməlidir. Aydın məsələdir ki, fiziki göstəriciləri ölçmək üçün avadanlıqlar, fitnes məkanları və müasir texniki baza tələb olunacaq. Digər tərəfdən, oyunçunun inkişafı beynəlxalq yarışlardan keçir. Futbolçular beynəlxalq oyunlar və turnirlər görmədikləri halda inkişaf qeyri-mümkündür. Bu maliyyənin bir hissəsi də məhz onların beynəlxalq təcrübə qazanmalarına xərclənəcək. Vacib məqamlar əsasən bu istiqamətlərdir”.
O, uşaq futboluna yatırılan investisiyanın uzunmüddətli xarakter daşıdığını xatırladıb: “Bir şeyi də əlavə etmək lazımdır ki, bu cür uzunmüddətli maliyyə ayrılırsa, burada söhbət 1, 2, 3 və ya 5 ildən getmir. Məsələn, 10-11 yaşındakı bir uşağa qoyulan investisiya və maliyyə onun yetkinlik dövrünə - təxminən 19-20 yaşına çatdıqda nəticə verir. Yəni təxminən 19 yaşında oyunçu artıq peşəkar liqalarda oynamaq potensialı əldə edə bilər. Bu da özlüyündə 9-10 illik müddəti əhatə edir. Dolayısı ilə, investisiyanın bəhrəsini yalnız 10 ildən sonra görmək mümkün olacaq. Digər tərəfdən, dünyada bu sahədə ən yaxşı göstəricilərə sahib ölkələrin - İspaniya, İngiltərə, Portuqaliya, İtaliya və Niderlandın statistikasını götürsək, bütün şəraitləri mükəmməl qursan, ən müasir metodlardan istifadə etsən və heç bir səhvə yol verməsən belə, akademiyalarda ortalama 1-3 faizarası peşəkar futbolçu yetişir. Bu o deməkdir ki, hər 100 uşaqdan təxminən 3-ü peşəkar futbolçu ola bilir. Qalanları zədələnir, inkişaf edə bilmir və ya rəqabətdən kənarda qalır. Buna görə də bu qədər maliyyə ayrıldıqda kütləvi şəkildə hamının peşəkar olacağını gözləmək olmaz. Biz bu prosesi 10 il deyil, 10 illərlə davam etdirməliyik. Digər klublarımız da bu təcrübəni tətbiq edib uşaq futboluna, infrastruktura, maariflənməyə milyonlar buraxsalar, "Sabah"dan 3, "Qarabağ"dan 3, "Neftçi"dən 3 nəfər çıxar və beləliklə peşəkar oyunçuların sayını çoxalda bilərik”.
Aslan Kərimovun fikrincə, uşaq futboluna qoyulan sərmayə təkcə peşəkar idmançı yetişdirmək məqsədi daşımır: “Bu o demək deyil ki, digər uşaqlar kənarda qalır. Futbol yalnız peşəkar idmançı olmaq üçün deyil. 100 uşaqdan 3-ü peşəkar olursa, qalanları çölə atılmır. Onlar uşaqlıq və gənclik dövründə futbolla məşğul olmaqla sağlam həyat tərzi sürür, sosiallaşır, başqaları ilə kommunikasiya qurur və pis vərdişlərdən uzaq qalırlar. Yəni biz təkcə peşəkar futbolçu yetişdirməklə məşğul olmalı deyilik, həm də gənclərimizi sağlam həyat tərzinə sövq etməliyik. Peşəkar səviyyəyə çatmasalar belə, futbol onlar üçün bir həyəcan və sağlamlıqdır. Bu səbəbdən məsələyə səthi yanaşmamalıyıq. Uşaq futboluna ayrılan maliyyə gənc nəslin sağlam gələcəyi və sosiallaşması üçün çox diqqətçəkən və vacib məqamdır”.
Bölmənin digər xəbərləri
