SAĞLAMLIQ ÜÇÜN TƏHLÜKƏLİ MƏMULATLAR MƏHV EDİLMİŞDİR

22.04.2004 [00:14]
Çap et
A⁺ A^-

AZƏRTAC-in müxbiri xəbər verir ki, Sumqayıtın sənaye və məişət tullantıları poliqonunda ölkəmizə qaçaqmalçılıq yolu ilə gətirilərkən Tovuz və Xaçmaz gömrük məntəqələrində saxlanılmış ərzaq məhsulları, pirotexnika, alkoqol, habelə tütün məmulatları məhv edilərək basdırılmışdır.

Dövlət Gömrük Komitəsinin səlahiyyətli nümayəndələrinin və “Azərterminalkompleks” İstehsalat Birliyi yanında fəaliyyət göstərən ləğvetmə komissiyası üzvlərinin iştirakı ilə 110,554 milyon manat dəyərində 57 banka qara kürü, 28,5 litr spirtəbənzər maye, çoxlu ət məhsulu – “Domaşnyaya” və “Olimp” vetçinası, “Yevropeyskaya” və “Rojdestvenskaya” hindtoyuğu əti, 15 min 270 qutu pirotexnika, 54 min 464 qutu müxtəlif adlı tütün məmulatı məhv edilmişdir.

Sadalanan bütün mallar Ədliyyə Nazirliyi yanında Məhkəmə Ekspertizası, Kriminalistika və Kriminologiya Problemləri Elmi Tədqiqat İnstitutunda, Dövlət Baş Yanğın Təhlükəsizliyi İdarəsinin Elmi Tədqiqat İnstitutunda və ekspertiza mərkəzində, habelə Bakı Gigiyena və Epidemiologiya Mərkəzində müvafiq yoxlamadan keçirilmişdir.

SAĞLAMLIQ ÜÇÜN TƏHLÜKƏLİ MƏMULATLAR MƏHV EDİLMİŞDİR

MÜƏLLİFLƏ ƏLAQƏ