“Samsung” şirkətinin rəhbərliyi Hindistandakı zavodunun tətil edən işçiləri ilə danışıqlara razılaşıb
Bakı, 7 oktyabr, AZƏRTAC
“Samsung India Electronics” şirkətinin rəhbərliyi Tamiland ştatındakı zavodunun sentyabrın əvvəlindən tətil edən işçiləri ilə birbaşa danışıqlar aparmağa razılaşıb.
AZƏRTAC “Press Trust of India” nəşrinə istinadla xəbər verir ki, zavod rəhbərliyi əməkhaqqı, müavinətlər və iş şəraiti ilə bağlı bütün məsələləri birbaşa danışıqlar yolu ilə həll etməyə hazır olduğunu açıqlayıb.
Tətil edən zavod işçiləri ştat hakimiyyətini məsələyə tez bir zamanda müdaxiləyə vadar etmək üçün ötən həftə birgünlük aclıq aksiyası keçiriblər. Hindistanın Həmkarlar İttifaqları Mərkəzi aksiyanı dəstəkləyərək bildirib ki, işçilərin tələbləri tam yerinə yetirilənədək tətil davam edəcək.
“Samsung”un Hindistandakı törəmə şirkətinin zavodunda tətil sentyabrın 9-da başlayıb. Aksiyaya şirkətin 1750 əməkdaşından 1100-ü qatılıb. Onlar aylıq əməkhaqqının 25 min hind rupisindən (təxminən 300 dollar) 36 min rupiyə qədər artırılmasını, iş şəraitinin yaxşılaşdırılmasını və iş vaxtının azaldılmasını tələb edirlər.
Bölmənin digər xəbərləri
