SANKSİYALAR TƏTBİQ EDİLƏN ŞİRKƏTLƏRİN ADLARI AÇIQLANMIŞDIR
Xəbər verdiyimiz kimi, ABŞ Dövlət Departamenti kütləvi qırğın silahlarının istehsalında işlədilən mallar ixrac etdiyinə görə Ermənistan, Moldova və Çinin bir sıra şirkətlərinə qarşı sanksiyalar tətbiq olunacağını elan etmişdir. Dövlət Departamentində keçirilən brifinqdə bu barədə danışan mətbuat katibi Riçard Bauçer həmin şirkətlərin Amerikanın hökumət yardımından məhrum ediləcəyini, dövlət təşkilatlarının nümayəndəlikləri ilə heç bir müqavilə bağlamaq hüququnun olmayacağını və yardım proqramlarında iştirak etməyəcəyini vurğulamışdır.
ABŞ-ın rəsmi qanunları, prezidentin fərmanları çap edilən “Federal Recister” gündəlik toplusunda mayın 16-da 10 şirkətin adı açıqlanmışdır. Həmin şirkətlər, o cümlədən Ermənistanın “Lizen Open Joint Stock Kompany” və “Armen Sarkisyan” şirkətləri iki il müddətinə qadağalarla üzləşəcəkdir. Yardım almaq və yardım proqramlarından məhrum edilməklə yanaşı, adı çəkilən şirkətlərə “Silahların İxracına Nəzarət Aktı” üzrə müdafiə sahəsində istifadə olunan mallar, sursart və xidmətlər satılmayacaq, yeni lisenziyalar verilməyəcək, mövcud lisenziyalar isə dayandırılacaqdır.
Şəfəq Akifqızı
AzərTac-ın xüsusi müxbiri
Vaşinqton
Bölmənin digər xəbərləri
