SANKT-PETERBURQDA DAHİ NİZAMİNİN ABİDƏSİNİN TƏHQİR OLUNMASI İLƏ BAĞLI CİNAYƏT İŞİ QALDIRILMIŞDIR
Sentyabrın 8-də Sankt-Peterburqda vandalizm aktı törədilmişdir: naməlum şəxslər dahi Azərbaycan şairi Nizami Gəncəvinin burada ucaldılmış və bu il iyulun 10-da Azərbaycan Prezidenti Heydər Əliyevin və Rusiya Prezidenti Vladimir Putinin iştirakı ilə təntənəli şəraitdə açılmış abidəsini təhqir etmişlər.
Peterburq və Leninqrad vilayəti üzrə Daxili İşlər İdarəsinin məlumatına görə, naməlum şəxslər Azərbaycan hökumətinin Sankt-Peterburqun 300 illiyinə hədiyyəsi olan 5 metrlik tunc abidənin üstünə ağ boya tökmüşlər.
Azərbaycan Respublikasının Sankt-Peterburqdakı fəxri konsulu Qüdsi Osmanov bu cinayətlə bağlı AZƏRTAC-ın müxbirinə demişdir ki, Rusiyanın şimal paytaxtının hüquq-mühafizə orqanları bu vəhşilik faktı üzrə cinayət işi qaldırmışdır və hazırda istintaq aparılır. Onun sözlərinə görə, hələlik heç bir ilkin yozum yoxdur. Azərbaycan konsulluğu “Skulptura” kombinatından mütəxəssislər dəvət etmişlər. Onlar abidənin səthini zədələmədən boyanı təmizləyəcəklər. Q.Osmanov demişdir ki, bu qeyri-insani hərəkətdən hiddətlənən şəhər sakinləri Azərbaycanın Peterburqdakı konsulluğuna zəng edərək, təəssüfləndiklərini bildirirlər.
Asiya Hacızadə
AZƏRTAC-ın xüsusi müxbiri
MOSKVA
Bölmənin digər xəbərləri
