Şanxaydakı "Disneyland" parkı yenidən ziyarətçi qəbuluna başlayacaq
Pekin, 8 may, AZƏRTAC
Çində populyar turizm məkanlarından olan Şanxay "Disneyland"i mayın 11-dən yenidən ziyarətçilərin qəbuluna başlayacaq.
AZƏRTAC xəbər verir ki, ölkədə yeni növ koronavirus (COVID-19) epidemiyası ilə əlaqədar 3 aydan çoxdur qapalı olan "Disneyland" parkına giriş üçün biletlər yalnız onlayn formada satışa çıxarılıb. Mayın 11-dən 16-dək olan günlər üçün biletlərin hamısı satış başlayandan 3 dəqiqə ərzində satılıb. Gündəlik ziyarətçi limiti ilə bağlı hələlik dəqiq məlumat olmasa da, Şanxay hökuməti 24 minlik limit təklif edib.
Bildirilir ki, parka giriş və ziyarət zamanı ciddi anti-epidemiya tədbirləri, o cümlədən sosial məsafə, maska taxılması, dezinfeksiya qaydaları tətbiq olunacaq.
Qeyd edək ki, dekabrın son günlərində Hubey vilayətinin Uxan şəhərində aşkarlanan yeni növ koronavirus yanvar və fevral aylarında ölkədə sürətlə yayılıb. Hökumət epidemiya ilə mübarizə tədbirləri çərçivəsində bütün kütləvi tədbirləri, o cümlədən turizm və istirahət mərkəzlərini bağlamışdı. Martın ortalarından başlayaraq Çində epidemioloji vəziyyət yaxşılaşmağa başlayıb. Ötən sutka Çinin materik hissəsində COVID-19 infeksiyasına cəmi bir yoluxma qeydə alınıb. Hazırda ölkənin səhiyyə ocaqlarında 260 aktiv xəstə var.
Çinin Honkonq xüsusi inzibati bölgəsində indiyədək 1044 yoluxma və 4 ölüm, Makao xüsusi inzibati bölgəsində 45 yoluxma, Tayvan adasında isə 440 yoluxma və 6 ölüm baş verib.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
