Səbail rayonu yeni inkişaf mərhələsini yaşayır
Bakı, 14 iyul (AZƏRTAC, Samirə Allahverdiyeva). Azərbaycan Respublikasının Prezidenti İlham Əliyevin sədrliyi ilə Nazirlər Kabinetinin 2014-cü ilin 6 ayının sosial-iqtisadi inkişafının yekunlarına və qarşıda duran vəzifələrə həsr olunmuş geniş iclasındakı nitqindən irəli gələn vəzifələr iyulun 14-də Səbail rayon İcra Hakimiyyəti başçısı yanında şuranın rayonun sənaye müəssisələri, təsərrüfat xidmətləri, təhsil, səhiyyə müəssisələri, hüquq mühafizə orqanları rəhbərlərinin, bələdiyyələrin, gənclər təşkilatlarının və ictimaiyyət nümayəndələrinin iştirakı ilə keçirilən iclasında ətraflı müzakirə olundu.
İclası giriş sözü ilə açan rayon icra hakimiyyətinin başçısı Asif Əsgərov bildirdi ki, bu gün ümummilli liderimiz Heydər Əliyevin Azərbaycanda hakimiyyətdə gəlməsinin 45 illiyi tamam olur. Azərbaycan dövlətçiliyi ideyasının yaşaması və sonradan yenidən reallaşdırılması birbaşa olaraq 1969-cu il iyulun 14-də respublikamızda hakimiyyətə gələn ulu öndər Heydər Əliyevin adı ilə bağlıdır.
Azərbaycan Respublikasının Prezidenti İlham Əliyevin sədrliyi ilə Nazirlər Kabinetinin 2014-cü ilin birinci yarısının sosial-iqtisadi inkişafının yekunlarına həsr olunmuş iclası barədə ətraflı məlumat verilərək hesabat dövründə Səbail rayonu üçün də uğurlu olmuşdur. Bu ilin 6 ayında rayonun sənaye müəssisələri 11 milyard 534,5 milyon manatlıq və ya keçən ilin müvafiq dövrünə nisbətən 1,3 faiz çox sənaye məhsulu istehsal etmiş, nəqliyyat müəssisələri 256,2 milyon manatlıq və ya 1,7 faiz çox, rabitə müəssisələri 132,1 milyon manatlıq və ya 1,4 faiz çox xidmətlər göstərmişlər.
Bütün maliyyə mənbələri hesabına əsas kapitala investisiya qoyuluşu 2 milyard 512,5 milyon manat olmuşdur. Bu, əvvəlki ilin müvafiq dövrünə nisbətən 35,5 faiz çoxdur. Tikinti-quraşdırma işlərinə yönəldilmiş investisiyanın həcmi 1 milyard 114,6 milyon manat və ya ilin müvafiq dövrü ilə müqayisədə 73,2 faiz çox olmuşdur .
Məlumat verildi ki, bu ilin 6 ayı ərzində Səbail rayonu ərazisində 1190 yeni iş yeri açılmışdır. Bunlardan hamısı daimi iş yerləridir.
İclasda əldə olunmuş nailiyyətlərlə yanaşı, həllini gözləyən problemlər, çatışmazlıqlar və onların aradan qaldırılması yolları, rayonda aparılması nəzərdə tutulan abadlıq işləri və vətəndaşların müraciətləri ilə bağlı görülən tədbirlər də müzakirə edildi.
Qeyd olundu ki, hazırda rayon ərazisində su idmanı sarayının, Azərbaycan Xalçası və Xalq Tətbiqi Sənəti Dövlət Muzeyi üçün yeni binanın, “Alov qüllələri” kompleksinin, Oksford məktəbi üçün yeni tədris korpusunun, “Cənub” mehmanxanasının sökülərək yerində 7 mərtəbəli yeni mehmanxananın, Qurban Abbasov küçəsində yeni İş mərkəzinin, 5 mərtəbəli “İnturist” mehmanxanasının, “20-ci sahə”də Səbail Rayon Prokurorluğunun yeni inzibati binasının, Əhəd Yaqubov küçəsində müasir istedadlar məktəbi üçün yeni idman və yataqxana komplekslərinin, 9 saylı xəzinədarlıq idarəsi üçün yeni binanın, Əhəd Yaqubov küçəsində kütləvi informasiya vasitələri işçiləri üçün daha bir yeni binanın tikintisi, Bayıl dairəsində genişmiqyaslı abadlıq işləri, Dənizkənarı Milli Parkın Bibiheybət qəsəbəsinə kimi genişləndirilməsi və burada yeni istirahət guşələrinin yaradılması işləri aparılır, Neftçilər prospektində İdman Oyunları Sarayı əsaslı təmir olunur, həmçinin Heydər Əliyev Fondunun təşəbbüsü ilə Badamdar qəsəbəsində “Könül” körpələr evinin əsaslı təmiri və yenidən qurulması həyata keçirilir.
Hesabat dövründə Səbail Rayon İcra Hakimiyyəti tərəfindən bir sıra tədbirlər reallaşdırılıb. Novruz bayramı və Silahlı Qüvvələr Günü ərəfəsində rayon ictimaiyyətinin nümayəndələri ənənəvi olaraq rayonun hamilik etdiyi, cəbhənin ön xəttində yerləşən hərbi hissənin şəxsi heyətinə rayonun orta ümumtəhsil məktəblərinin şagirdləri tərəfindən hazırlanmış bayram sovqatları, hərbi hissənin tələbatları üçün müxtəlif tikinti materialları çatdırılıb, incəsənət ustaları onların qarşısında böyük bayram konserti vermişlər.
Müxtəlif bayramlarla əlaqədar rayonda 6100 aztəminatlı ailəyə ərzaq bağlamaları, 1500 pay ət verilib, ümumilikdə isə 6 ay ərzində rayon icra hakimiyyəti tərəfindən hədiyyə ilə təltif olunanların, müxtəlif yardım, ərzaq bağlamaları alanların sayı 8323 olmuşdur.
Tədbirin sonunda ümummilli lider Heydər Əliyevin anadan olmasının 91 illiyinə həsr edilmiş “Gül bayramı”nda fəal iştirak etdiklərinə görə 6 nömrəli orta məktəbin, 132-134 nömrəli Təhsil Kompleksi və Azərbaycan Dövlət Pedaqoji Universitetinin kollektivləri rayon icra hakimiyyətinin diplomları ilə təltif olunmuşlar.
Bölmənin digər xəbərləri
