Səbail rayonunda içməli su şəbəkəsi yenidən qurulur
Bakı, 21 may, AZƏRTAC
“Azərsu” ASC Bakı şəhəri və ətraf qəsəbələrdə əhalinin içməli su təchizatının yaxşılaşdırılması məqsədilə layihələrin icrasını davam etdirir.
Qurumdan AZƏRTAC-a bildirilib ki, ASC-nin daxili imkanları hesabına Səbail rayonu 20-ci sahə yaşayış massivi Dəmirçilər adlanan ərazidə içməli su şəbəkəsinin yenidən qurulması işləri həyata keçirilir.
Qeyd edək ki, sözügedən ərazidə mərkəzləşdirilmiş içməli su şəbəkəsi mövcud olmayıb. Su təchizatı əhali tərəfindən fərdi qaydada yaradılıb və tikinti normalarına uyğun gəlməyən şəbəkələr hesabına aparılıb. İstismar olunaraq yararsız vəziyyətə düşmüş su xətlərində tez-tez qəzalar baş verir və əhalinin içməli su təchizatında çətinliklər yaranırdı. İndiyədək sakinlər günaşırı olmaqla cəmi 2 saat içməli su ilə təmin olunurdu. Bəzi hallarda sakinlər suyu maşınlarla almaq məcburiyyətində qalırdı.
Bütün bunlar nəzərə alınaraq ərazidə yeni şəbəkənin yaradılmasına qərar verilib. Layihə çərçivəsində ərazidə 1 kilometrdən artıq içməli su şəbəkəsi yaradılıb və 150 fərdi yaşayış evi və obyektin şəbəkəyə qoşulması təmin edilib. Hazırda abonentlərin sayğaclarla təmin edilməsi işləri aparılır. Layihənin icrasının yaxın günlərdə tam başa çatdırılması nəzərdə tutulur.
Yeni layihənin icrasından sonra sakinlər artıq hər gün qrafikli rejimlə içməli su ilə təmin olunacaq. Yeri gəlmişkən, indiyədək əraziyə içməli su “Şimal” nasos stansiyasından verilirdi. Yeni şəbəkənin “+220 Badamdar” su anbarından ayrılan xəttə qoşularaq su təminatı özüaxımlı rejimdə aparılacaq. Bu layihənin davamı olaraq 20-ci sahə yaşayış massivinin digər küçələrində də yenidənqurma, təmir-bərpa və tənzimləmə işləri davam etdiriləcək.
Hazırda “Azərsu” ASC-nin daxili imkanları hesabına Səbail rayonu ilə yanaşı, Binəqədi, Sabunçu, Suraxanı, Xəzər rayonlarında, həmçinin regionlarda Hacıqabul, Saatlı, Tovuz, Biləsuvar rayonlarının kənd və qəsəbələrində içməli su təchizatının yaxşılaşdırılması məqsədilə layihələrin icrası davam etdirilir.
Bölmənin digər xəbərləri
