SEÇKİ MƏCƏLLƏSİ LAYİHƏSİNİN İLK GENİŞ MÜZAKİRƏSİ BAŞLANMIŞDIR
Dekabrın 16-da ATƏT-in Demokratik Təsisatlar və İnsan Hüquqları Bürosunun (ODİHB), Avropa Şurasının və Azərbaycan hökumətinin təşkil etdiyi “dəyirmi masa” iclasında Prezidentin İcra Aparatının, parlamentin, siyasi partiyaların, ATƏT və Avropa Şurası nümayəndələrinin iştirakı ilə, Seçki Məcəlləsinin ilk geniş müzakirəsi keçirilmişdir.
İclasda sədrlik edən ODİHB-nin baş müşaviri Nikolay Vulçanov sənədin əsas parametrlərindən qısaca danışaraq, əmin olduğunu söylədi ki, seçkilərədək qalan dövrdə Seçki Məcəlləsi daha da təkmilləşdiriləcəkdir. O dedi ki, bəzi müxalifət partiyaları rəhbərlərinin belə mötəbər müzakirəyə gəlməməsi ancaq təəssüf hissi doğurur.
Prezidentin İcra Aparatının qanunvericilik və Hüquq ekspertizası şöbəsinin müdiri Şahin Əliyev Seçki Məcəlləsi layihəsinin əsas cəhətləri barədə çıxış edərək dedi ki, bu sənədin hazırlanmasından başlıca məqsəd prezident, parlament və bələdiyyə seçkilərinin, habelə referendumun keçirilməsi qaydasındakı fərqləri aradan qaldırmaqdır. Belə ki, bu fərqlər Mərkəzi Seçki Komissiyasının fəaliyyətində problemlər yaradır. Şahin Əliyev bu məsələdə bəzi müxalifət partiyalarının mövqeyini qeyri-əməli mövqe adlandıraraq dedi ki, onların irəli sürdükləri 4 şərtdən 3-ü qəbul olunmuşdur, razılaşdırma komissiyası yaratmaq ideyasına gəlincə isə, onlara bildirilmişdir ki, konkret təkliflərini əvvəlcədən versinlər, lakin müxalifət bununla razılaşmamışdır.
Şahin Əliyev sənəddəki yeniliklərdən danışaraq vurğuladı ki, bunlar, ilk növbədə, seçki protokollarına dair tələblərə aiddir: bülletenlər nömrələnəcək və zərfə qoyulub seçki qutularına atılacaqdır. Bundan əlavə, qanun pozuntuları 2 saat ərzində aradan qaldırılmasa, həmin seçki məntəqəsi üzrə nəticələr ləğv olunacaqdır.
Sonra Milli Məclis sədrinin müavini Ziyafət Əsgərov, parlament aparatının rəhbəri Səfa Mirzəyev, Yeni Azərbaycan Partiyasının icraçı katibi Əli Əhmədov və başqaları çıxış edərək, bu mühüm sənədin mütərəqqi cəhətlərini konkret faktlarla əsaslandırdılar. Eyni zamanda vurğuladılar ki, bəzi müxalifət partiyalarının qeyri-əməli mövqeyi Seçki Məcəlləsinin layihəsinə dair onların konkret təkliflərinin olmaması ilə bağlıdır.
Prezidentin İcra Aparatının ictimai-siyasi şöbəsinin müdiri Əli Həsənov çıxışında nəzərə çarpdırdı ki, ölkədə ədalətli və şəffaf seçkilər keçirilməsi heç də təkcə iqtidarın və ya müxalifətin işi deyildir, bu, Azərbaycan cəmiyyətinin bütün təbəqələrinə aiddir və Məcəllə ondan siyasi hoqqabazlıq məqsədi ilə istifadə etməyə çalışan müxalifət rəhbərlərinin yox, ilk öncə, xalqın mənafelərinə cavab verməlidir.
Fasilədən sonra qruplarda davam etdirilən müzakirələrdə Avropa Şurası Venesiya Komissiyasının, ODİHB-nin, Beynəlxalq Azad Seçkilər Təşkilatının ekspertləri çıxış etdilər.
Seçki Məcəlləsi layihəsinin növbəti müzakirəsi dekabrın 17-də olacaqdır.
Bölmənin digər xəbərləri
