SƏHİYYƏ NAZİRLİYİ XƏBƏRDARLIQ EDİR
Kütləvi informasiya vasitələrinin xəbər verdiyi kimi, Rusiya Federasiyasının Krasnodar diyarında kəskin bağırsaq infeksiyası olan dizenteriya xəstəliyinin epidemiyası qeydə alınmışdır. Kütləvi surətdə zəhərələnənlərin sayı artıq 1000 nəfər həddindədir.
Ehtimala görə, infeksiyaya səbəb diyardakı Kropotkin süd kombinatının məhsulları - xama, süd və yoqurt olmuşdur. Hazırda bunun dəqiqləşdirilməsi üçün laborator tədqiqatları aparılır.
Rusiya Federasiyasının Səhiyyə Nazirliyi tərəfindən infeksiyanın qarşısının alınması üçün profilaktik və müalicə xarakterli tədbirlər görülməkdədir.
Respublika Səhiyyə Nazirliyindən AZƏRTAC-a bidirmişlər ki, Krasnodar diyarından Azərbaycana xeyli miqdarda süd məhsullarının idxal olunduğunu nəzərə alaraq, nazirlik Sanitariya-Karantin Xidmətinə həmin məhsulların ölkəmizə gətirilməsinin qadağan edilməsi barədə müvafiq göstəriş vermişdir.
Səhiyyə Nazirliyi əhaliyə tövsiyə edir ki, Krasnodar diyarından naməlum və qeyri-qanuni yollarla respublikaya gətirilən süd məhsullarından istifadə etməsinlər.
Bölmənin digər xəbərləri
