Bakı, 2 oktyabr, AZƏRTAC

“Azərbaycan şairləri İranə Qasımova ilə” adlı yeni layihənin ikinci gecəsi baş tutub. Tədbir müasir Azərbaycan poeziyasının nümayəndəsi Səidə Sübhinin yaradıcılığına həsr olunub.

AZƏRTAC xəbər verir ki, gecənin əvvəlində moderator, memar, rəssam və bədii layihənin kuratoru Nurziyyə Xəlilova şairlə söhbət edib. Sonra qonaqlar həm müəllifin özünün, həm də həmkarlarının ifasında Səidə Sübhinin şeirlərinin qiraətini dinləyiblər. Tədbirdə şairlər və oxucular Natali, İrina Kisluxina, Emil Tağıyev, Hacı Həşimov, Leyla Qurbanova, Eldar Cahangirbəyov, Mariya Petriyenko çıxış ediblər.

Səidə Sübhi Azərbaycan Yazıçılar Birliyinin üzvü, “Somnambula” şeirlər toplusunun müəllifidir. Onun şeirləri türk dilinə tərcümə edilərək Türkiyədə ayrıca “Ozanın monoloqu” almanaxı şəklində nəşr olunub.

“Azərbaycan şairləri” layihəsinin rəhbəri və təşkilatçısı İranə Qasımova Azərbaycan Yazıçılar Birliyinin üzvü, bir neçə şeir toplusunun müəllifi, “Qızıl Qələm” mükafatı laureatı, rejissor və ssenaristdir. O, həmçinin populyar “Açıq poeziya mikrofonu”, “Poetik battle” və “Poeziya klassikləri” layihələrinin də müəllifi və təşkilatçısıdır.