ŞƏKİ ELEKTRİK STANSİYASINDA İŞİN SƏMƏRƏSİ ARTIR
“Azərenerji” Açıq Səhmdar Cəmiyyətinin mətbuat xidmətindən AZƏRTAC-a verilən xəbərə görə, cari ilin birinci yarısında Şəki Elektrik Stansiyasında 154 milyon kilovat-saatdan artıq elektrik enerjisi istehsal edilmişdir. Bu göstərici proqnozlaşdırılan səviyyədən 14 milyon kilovat- saat çox, ötən ilin müvafiq dövrü ilə müqayisədə isə 43 milyon kilovat-saat azdır.
İstehsalın azaldılması istehlakçılar tərəfindən elektrik enerjisindən məqsədyönlü şəkildə istifadə edilməsinə yönəldilmiş tədbirlərin həyata keçirilməsi, elektrik sayğaclarının quraşdırılması, regionda qaz təchizatının bərpa edilməsi, israfçılıq faktlarının aradan qaldırılması sayəsində mümkün olmuşdur.
Keçən ay stansiyada 28,5 milyon kilovat-saat elektrik enerjisi istehsal edilmişdir. Bu, proqnoz göstəricisindən 3,5 milyon kilovat-saat və ya 2007-ci ilin müvafiq dövründəkindən 8 milyon kilovat-saat çoxdur. Elektrik enerjisinin xüsusi sərfi təqribən 540 min kilovat-saat olmuşdur. Başqa sözlə, 10 min kilovat-saat elektrik enerjisinə qənaət edilmişdir.
Bildirilir ki, Şəki enerji qovşağının balansında olan 110 kilovoltluq “Şəki” yardımçı stansiyasında təmir işləri və ərazinin abadlaşdırılması üzrə tədbirlər həyata keçirilir.
Xatırladaq ki, 10 aqreqatdan ibarət olan 87 meqavatlıq Şəki elektrik stansiyası 2006-cı ilin oktyabrında istifadəyə verilmişdir.
Bölmənin digər xəbərləri
