Şəki-Zaqatala bölgəsində Xocalı faciəsi qurbanlarının xatirəsi anılıb
Şəki-Zaqatala bölgəsi, 26 fevral, Mustafa Dadaşov, AZƏRTAC
Xalqımızın tarixinə qanla yazılan Xocalı faciəsinin iyirmi dördüncü ildönümü Şəki-Zaqatala bölgəsində də silsilə tədbirlərlə qeyd olunub.
AZƏRTAC xəbər verir ki, faciənin ildönümü ilə əlaqədar fevralın 26-da Qax şəhərində keçirilən ümumrayon anım tədbirinin iştirakçıları əvvəlcə Şəhidlər xiyabanına gələrək, Vətənimizin azadlığı uğrunda canlarından keçən igid həmvətənlərin məzarları üzərinə gül-çiçək düzüb, şəhidlərin xatirəsini ehtiramla yad ediblər.
Sonra tədbir iştirakçıları YAP rayon təşkilatının inzibati binasının foyesində məktəblilərin Xocalı mövzusunda çəkdikləri rəsm əsərlərindən ibarət sərgiyə baxıblar.
Tədbirdə səslənən məruzə və çıxışlarda bildirilib ki, insanlığa qarşı ən amansız kütləvi terror hadisələrindən olan Xocalı soyqırımından 24 il keçir. 1992-ci il fevralın 25-dən 26-na keçən gecə erməni millətçiləri rus hərbi birləşmələrinin köməyi ilə Xocalıda misli görünməyən qətliam törədiblər. Həmin müdhiş fevral gecəsində 613 nəfər soydaşımız xüsusi amansızlıqla qətlə yetirilib, 8 ailə tamamilə məhv edilib, 487 nəfər, o cümlədən 76 uşaq ağır yaralanıb, 1275 nəfər dinc sakin girov götürülb.
Bildirilib ki, Xocalı faciəsi xalqımızı sarsıtsa da, onun dözümünü, iradəsini qıra bilməyib, əksinə, xalqımız daha da mətinləşib.
Tədbirin sonunda Xocalı faciəsinin dəhşətli anlarını əks etdirən sənədli film nümayiş etdirilib.
X X X
Azərbaycan xalqının yaddaşında tariximizin ən faciəli günlərindən biri kimi dərin iz buraxan Xocalı faciəsinin 24-cü ildönümü münasibətilə Şəki Dövlət Dram Teatrında keçirilən ümumrayon tədbirində əvvəlcə soyqırımı qurbanlarının xatirəsi bir dəqiqəlik sükutla yad edilib.
AZƏRTAC xəbər verir ki, şəhər rəhbərliyinin, rayonda məskunlaşan Xocalıdan olan məcburi köçkünlərin, ictimaiyyət nümayəndələrinin iştirak etdiyi tədbirdə bu qətliamın Ermənistanın Dağlıq Qarabağı işğal etmək məqsədi ilə başladığı işğalçılıq müharibəsinin gedişində azərbaycanlılara qarşı törətdikləri soyqırımı cinayətinin ən dəhşətlisi olduğu xüsusi vurğulanıb.
Tədbirdə rayonun Çələbixan qəsəbəsində fəaliyyət göstərən Xocalı şəhər 3 nömrəli tam orta məktəbin direktoru Eldəniz Məhərrəmov çıxış edərək faciənin başvermə səbəbləri, nəticələri, ermənilərin dinc əhaliyə qarşı törətdikləri vəhşiliklər barədə danışıb.
Sonra Xocalı həqiqətlərinə dair film nümayiş olunub, mədəniyyət işçiləri və musiqi kollektivləri ədəbi-bədii kompozisiya ilə çıxış ediblər.
Rayonda məskunlaşan məcburi köçkün ailələrinə şəhər icra hakimiyyəti tərəfindən maddi yardım göstərilib.
X X X
Xocalı faciəsinin ildönümü Zaqatala rayonunda da silsilə tədbirlərlə qeyd olunub.
Fevralın 26-da rayon rəhbərliyi, ictimaiyyətin nümayəndələri, rayonda məskunlaşan Xocalıdan olan məcburi köçkünlər Zaqatala şəhərindəki “Azərbaycanlıların soyqırımı” abidəsinin önünə gül-çiçək düzüb, şəhidlərin xatirəsini ehtiramla yad edib, rayon Mədəniyyət Mərkəzinin foyesində məktəblilərin Xocalı mövzusunda çəkdikləri rəsm əsərlərindən ibarət sərgiyə baxıblar.
AZƏRTAC xəbər verir ki, anım tədbirində çıxış edənlər erməni millətçilərinin xalqımıza qarşı zaman-zaman həyata keçirdikləri soyqırımı siyasətindən bəhs edib, Xocalı faciəsinin acı nəticələrini konkret faktlarla diqqətə çatdırıblar. Bildirilib ki, öz miqyasına və dəhşətli nəticələrinə görə heç bir tarixi hadisə ilə müqayisə olunmayan Xocalı soyqırımının törədilməsində əsas məqsəd Dağlıq Qarabağı və Azərbaycanın digər torpaqlarını ələ keçirmək, xalqımızın mübarizə əzmini qırmaq idi.
Diqqətə çatdırılıb ki, hazırda Xocalı qətliamı ilə bağlı həqiqətlərin dünya ictimaiyyətinə çatdırılması istiqamətində ölkə rəhbərliyi, eləcə də Heydər Əliyev Fondu tərəfindən məqsədyönlü iş aparılır.
Tədbirin sonunda rayonda məskunlaşan Xocalıdan olan məcburi köçkünlərə ərzaq yardımı paylanılıb.
X X X
Xocalı faciəsinin 24-cü ildönümü ilə əlaqədar Balakən rayonunda keçirilən anım tədbirinin iştirakçıları əvvəlcə Şəhidlər xiyabanına gələrək, Qarabağ müharibəsində şəhid olan igid həmyerlilərinin xatirəsinə ucaldılan abidənin önünə gül-çiçək düzüblər.
AZƏRTAC xəbər verir ki, tədbir iştirakçıları rayon Mədəniyyət Mərkəzinin foyesində Xocalı faciəsindən bəhs edən rəsm sərgisi ilə tanış olub, mədəniyyət işçilərinin hazırladıqları “Heç zaman yaddaşlardan silinməyən izlər” adlı ədəbi-bədii kompozisiyaya baxıblar.
Tədbirin sonunda rejissor Vahid Mustafayevin “Xoca” filmi nümayiş etdirilib.
X X X
Bəşər tarixinin ən dəhşətli və qanlı hadisələrindən olan Xocalı faciəsinin 24-cü ildönümü Oğuz rayonunda da silsilə tədbirlərlə qeyd olunub. Tədbirlər planına uyğun olaraq, rayonun müəssisə və təşkilatlarında, ümumtəhsil məktəblərində, mədəniyyət ocaqlarında anım tədbirləri, konfranslar, müsabiqələr keçirilib, sərgi və guşələr təşkil edilib.
AZƏRTAC xəbər verir ki, fevralın 26-da rayon ictimaiyyətinin nümayəndələri Şəhidlər xiyabanına gələrək, torpaqlarımızın bütövlüyü uğrunda mübarizədə şəhid olan həmvətənlərimizin xatirəsini ehtiramla anıblar.
Rayon icra hakimiyyətində keçirilən görüşdə çıxış edənlər erməni millətçilərinin keçmiş sovet ordusunun 366-cı motoalayının köməyi ilə 24 il əvvəl Xocalıda törətdikləri qırğının acı nəticələrindən danışıblar. Bildirilib ki, Xocalı haqqında həqiqətlərin üzə çıxarılması, bu faciənin xalqımıza qarşı soyqırımı aktı kimi tanınması üçün Azərbaycan dövləti tərəfindən bütün addımlar atılır.
Məktəblilərin hazırladıqları ədəbi-bədii kompozisiyanın nümayişindən sonra orta məktəb şagirdləri arasında keçirilən “Xocalı - qan yaddaşımızdır” mövzusunda inşa yazı və rəsm müsabiqəsinin qaliblərinə mükafatlar təqdim olunub.
Bölmənin digər xəbərləri
