Şəkidə indiyədək 62 min hektardan çox sahədə payızlıq səpin aparılıb
Şəki, 18 dekabr, Mustafa Dadaşov, AZƏRTAC
Respublikanın ən iri taxılçılıq rayonlarından olan Şəkidə 2022-ci ilin məhsulu üçün payızlıq dən bitkilərinin səpini yekunlaşmaq üzrədir. Cari ildə rayonda gələn ilin məhsulu üçün 66 min 100 hektar sahədə payızlıq dənli bitkilərin səpini proqnozlaşdırılır. Torpaq mülkiyyətçiləri indiyədək 32 min 108 hektarı buğda, 29 min 997 hektarı dən üçün arpa olmaqla, 62 min 105 hektar sahəyə toxum səpiblər.
Bu barədə AZƏRTAC-ın bölgə müxbirinə Şəki Dövlət Aqrar İnkişaf Mərkəzinin bitkiçilik sektorunun müdiri Sahib Abdulhəmidov məlumat verib.
Bildirilib ki, səpin aparılacaq sahələrin şumlanması artıq yekunlaşıb. Səpin kampaniyasının yaxın günlərdə başa çatdırılması nəzərdə tutulur. Hazırda payızlıq taxıl səpilmiş sahələrdə müvafiq qurumlar tərəfindən fitosanitar müşahidə və zərərvericilərə qarşı kimyəvi mübarizə tədbirləri aparılır, sahələr suvarılır.
Xatırladaq ki, cari mövsümdə rayonda 63 min 531 hektar sahənin məhsulu biçilib, 204 min 907 ton taxıl istehsal olunub. Hər hektardan orta məhsuldarlıq 32,3 sentner təşkil edib. Taxıl istehsalı əvvəlki illə müqayisədə 6 min 191 ton artıb.
Bölmənin digər xəbərləri
