“The Independent”: Britaniyada festivalda lövhənin aşması nəticəsində bir nəfər ölüb, altı nəfər yaralanıb
Bakı, 29 avqust, AZƏRTAC
Böyük Britaniyanın Qərbi Sasseks qraflığında keçirilən “Big Church Festival” xristian musiqi festivalında lövhənin aşması nəticəsində azı bir nəfər ölüb, altı nəfər yaralanıb. Bu barədə “The Independent” qəzeti məlumat yayıb.
AZƏRTAC xəbər verir ki, qəzetin yazdığına görə, yerli vaxtla təxminən saat 15:38-də polis əməkdaşları festivalda ziyarətçilərin üzərinə böyük bir lövhənin düşməsi barədə məlumat daxil olduqdan sonra Vaşinqton-roudda yerləşən hadisə yerinə gəliblər. Daha sonra polis hadisə nəticəsində 41 yaşlı kişinin həlak olduğunu, azı altı nəfərin isə yaralandığını təsdiqləyib.
Hadisədən sonra tədbirin təşkilatçıları festivalın ləğv edildiyini bildiriblər.
“The Independent” qeyd edir ki, təşkilatçı şirkətin veb-saytında dərc olunan məlumata əsasən, “Big Church Festival” 2009-cu ildə təsis edilib və Böyük Britaniyanın ən böyük xristian festivalıdır.
Bölmənin digər xəbərləri
