Şəmkirdə oğurluq edən şəxslər yaxalanıblar
Bakı, 5 fevral, AZƏRTAC
Şəmkir rayonunda oğurluqlar edərək cinayət törətməkdə şübhəli bilinən 12 nəfərdən ibarət üç dəstənin üzvləri polis əməkdaşlarının keçirdikləri əməliyyat-axtarış tədbirləri nəticəsində saxlanılıb.
Daxili İşlər Nazirliyinin mətbuat xidmətinin Gəncə regional qrupundan AZƏRTAC-a bildiriblər ki, rayonun Seyfəlli kənd sakini Qələndər Qasımov və Çinarlı qəsəbə sakini Nicat Səfiyev rayon ərazisində dörd fərdi evə və bir mağazaya xüsusi vasitələrlə qeyri-qanuni yolla daxil olaraq müxtəlif məişət avadanlığını, ərzaq, tütün və alkoqol məmulatlarını oğurlayıblar. Daha sonra onlar rayon sakinləri - Elcan Süleymanov, Həsən Cabbarov, Zahir Məmmədov, Samir Namazov və İmamverdi Məmmədzadə ilə cinayət əlaqəsinə girərək oğurladıqları əşyaları satıblar. Dəstə üzvləri maddi sübutlarla birlikdə saxlanılaraq istintaqa təhvil verilib.
Polis əməkdaşlarının keçirdikləri daha bir uğurlu əməliyyat nəticəsində rayon ərazisində tikinti materialları və avadanlığı oğurlamaqda şübhəli bilinən üç nəfərdən ibarət daha bir dəstənin üzvləri saxlanılıb. Rayon sakinləri Bahadur Hacıyev, Eynur Məmmədov və Natiq Məmmədov əvvəlcədən planlaşdıraraq rayon ərazisindəki yaşayış olmayan fərdi evlərdən birinə qeyri-qanuni yolla daxil olaraq döşəmə üçün örtük, elektrik ağac mişarı, naqil və s. tikinti ləvazımatları oğurlayıblar. Həmin şəxslər oğurladıqları əşyaları satmaq istəyərkən polis əməkdaşları tərəfindən tutulublar.
Keçirilən növbəti əməliyyat-axtarış tədbirləri nəticəsində rayon sakinləri Əlixan Qasımovun və Elçin Əsgərovun Şəmkir rayonu ərazisində qara metal alqı-satqısı ilə məşğul olan zaman vətəndaşlara məxsus metal tərkibli müxtəlif əşyaları oğurladıqları müəyyənləşdirilib. Maddi sübutlarla birlikdə saxlanılan Ə.Qasımov və E.Əsgərov istintaqa təhvil verilib.
Hər üç faktla bağlı Şəmkir Rayon Polis Şöbəsinin istintaq və təhqiqat bölməsində cinayət işi başlanıb, araşdırmalar davam etdirilir.
Bölmənin digər xəbərləri
