Sentyabrın 15-i Azərbaycanda Bilik Günüdür
Yeni tədris ilində 2,2 milyon nəfərin təhsil alacağı proqnozlaşdırılır
Bakı, 15 sentyabr, AZƏRTAC
Azərbaycan Respublikasının Prezidenti İlham Əliyevin 2004-cü il 21 avqust tarixli Fərmanına əsasən sentyabrın 15-i ölkəmizdə Bilik Günü kimi qeyd olunur.
AZƏRTAC xəbər verir ki, bu il ümumi təhsil müəssisələrində ilk dərs “Şəhərsalma və Memarlıq İli”nə həsr olunacaq.
2026–2027-ci tədris ilində təqribən 2,2 milyon nəfərin təhsil alacağı proqnozlaşdırılır. Ümumi təhsil müəssisələrində 1,6 milyon, ali təhsildə 260 min, məktəbəqədər təhsil müəssisələrində 226 min, orta ixtisas təhsili müəssisələrində 64 min, peşə təhsilində isə 44 min nəfərin təhsil alacağı gözlənilir. Təqribən 124 min şagird I sinifdə təhsilə başlayacaq.
“Böyük Qayıdışa dair I Dövlət Proqramı” və azad edilmiş ərazilərdə təhsil
Azad edilmiş ərazilərdə yeni tədris ilində daha 15 təhsil müəssisəsi fəaliyyətə başlayır. Yeni təhsil müəssisələri Ağdam, Ağdərə, Xocalı, Cəbrayıl, Kəlbəcər, Xankəndi, Xocavənd və Zəngilanı əhatə edir.
Məktəbəqədər təhsil müəssisələrində uşaq sayı 408, işçi heyət 123 nəfərdən ibarətdir. Ümumi təhsil müəssisələrində şagird sayı 4825, işçi heyət 700 nəfərdən ibarətdir.
Təhsil infrastrukturu yenilənir
Son 25 ildə 4 minədək məktəb binası tikilib və ya əsaslı təmir olunub, 1 milyondan çox şagirdin təlim şəraiti yaxşılaşdırılıb. Yeni tədris ilində 37 müəssisə fəaliyyətə başlayır; digər müəssisələrdə tikinti, əsaslı təmir və layihələndirmə işləri davam etdirilir.
Məktəbəqədər təhsilin əhatə dairəsi genişləndirilir
Tələbat olan ərazilərdə yeni qrupların yaradılması, təmir və təchizat hesabına dövlət məktəbəqədər təhsil müəssisələrində yerlərin sayı 106 mindən 112 minə çatdırılıb.
Məktəbəqədər təhsildə valideyn-dövlət-özəl əməkdaşlığı modeli genişlənir. Ötən il model təxminən 4 min uşağı əhatə edib. Cari ildə əhatənin 10 min uşağa çatdırılması nəzərdə tutulur.
İcmaəsaslı qruplarda yerlərin sayı 23 mindən 36 minə çatdırılıb. Bu model ayrıca bağça infrastrukturu olmayan və ya mövcud bağçanın tələbatı qarşılamadığı kənd və ucqar yaşayış məntəqələri üçündür. Burada məqsəd yeni böyük infrastruktur yaratmadan təhsili uşağın yaşadığı yerə yaxınlaşdırmaqdır.
“Rəqəmsal bacarıqlar” və STEAM layihələri
Ötən tədris ilində “Rəqəmsal bacarıqlar” 771 məktəbdə 528 min şagirdi əhatə edib. Yeni tədris ilində layihənin 1001 məktəbə və təxminən 630 min şagirdə çatdırılması nəzərdə tutulur. STEAM isə ötən tədris ilində 407 məktəbdə 303 min 119 şagirdi əhatə edib və yeni tədris ilində onun əhatəsinin daha da genişləndirilməsi nəzərdə tutulur.
Yeni təmayül tədris modeli 90 məktəbdə tətbiq ediləcək
Yeni təmayül tədris modeli layihəsi 2024–2025-ci tədris ilində 5 məktəbdə başlayıb, 2025–2026-cı tədris ilində isə 14 məktəbdə davam edib. Bu il layihənin ilk məzunlarının 95 faizi ali təhsil müəssisələrinə qəbul olunub. Yeni tədris ilində layihənin 90 məktəbi əhatə etməsi nəzərdə tutulur.
Peşə ixtisasları kadr tələbatına uyğunlaşdırılır
Peşə təhsilinə qəbul 2021-ci illə müqayisədə əhəmiyyətli şəkildə artıb; 2030-cu ilədək 21 yeni peşə təhsili müəssisəsinin tikilməsi və 2 müəssisənin əsaslı təmiri nəzərdə tutulur. Yeni ixtisaslar aqrar sektor, sənaye, logistika, tikinti və qida sənayesinin kadr tələbatına uyğunlaşdırılır.
Ali təhsildə əlçatanlıq
2026–2027-ci tədris ilində ali təhsil müəssisələrinə 76 mindən çox abituriyent qəbul olunub və “Azərbaycan Respublikasının 2022–2026-cı illərdə sosial-iqtisadi inkişaf Strategiyası”nda müəyyən edilmiş illik 75 min qəbul hədəfi vaxtından əvvəl yerinə yetirilib. Müəllimlik ixtisasları üzrə yerlər azaldılır, mühəndislik, informasiya texnologiyaları və təbiət elmləri üzrə qəbul imkanları genişləndirilir.
Xarici ölkələrin nüfuzlu ali məktəblərində təhsil
Yeni tədris ilində “Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2028-ci illər üçün Dövlət Proqramı” çərçivəsində bakalavriat səviyyəsi 125, magistratura səviyyəsi üzrə 356, doktorantura səviyyəsi üzrə isə 19 nəfər olmaqla, ümumilikdə 500 nəfər təqaüdçü adını qazanıb.
Bölmənin digər xəbərləri
