DÜNYA
Səudiyyə Ərəbistanının Kralı Suriya Prezidentini Ərəb Liqası sammitinə dəvət edib
Bakı, 10 may, AZƏRTAC
Səudiyyə Ərəbistanının Kralı Salman bin Əbdüləziz Suriya Prezidenti Bəşər Əsədi mayın 19-da Krallıqda keçiriləcək Ərəb Liqası sammitinə dəvət edib.
AZƏRTAC “Saudi Press” informasiya agentliyinə istinadla xəbər verir ki, dəvət məktubunu Səudiyyə Ərəbistanının İordaniyadakı səfiri Naif bin Bəndər Dəməşqdə Suriyanın dövlət başçısı ilə görüşündə təqdim edib. Agentliyin məlumatında bildirilir ki, səfir Kral Salman bin Əbdüləziz və vəliəhd Məhəmməd bin Salmanın salamlarını və Suriya xalqına sülh və əmin-amanlıq arzularını Bəşər Əsədə çatdırıb.
Suriya Prezidenti, öz növbəsində, Kral Salmana və vəliəhd Məhəmmədə salamlarını çatdırmağı xahiş edib.
Xatırladaq ki, Ərəb Liqasının ötən həftə Qahirədə keçirilən iclasında Suriyanın bu təşkilatda 2011-ci ildə “dondurulmuş” üzvlüyü bərpa olunub. Ərəb ölkələri arasında yalnız Qətər Dövləti bu məsələdə bitərəf qalıb.