Seul Pxenyanı Şimal və Cənub arasında rabitə kanallarını saxlamağa çağırıb
Bakı, 9 iyun, AZƏRTAC
Koreya Respublikası KXDR-i iki ölkə arasında mövcud olan rabitə kanallarını bağlamamağa çağırıb.
AZƏRTAC xarici KİV-lərə istinadla xəbər verir ki, bu barədə Birləşmə Nazirliyinin rəsmi nümayəndəsi jurnalistlər üçün Seulda keçirilən brifinqdə deyib.
“Şimal və Cənub arasında telefon xətləri əlaqə yaratmaq üçün əsas alətdir və onlar əldə olunan razılaşmaya əsasən saxlanılmalıdır”, - deyə məmur bildirib. Onun sözlərinə görə, Seul bundan sonra da tərəflər arasında əldə olunan bütün sazişlərə əməl edəcək və Koreya yarımadasında sülhün bərqərar olunması üçün səy göstərəcək.
Koreya Mərkəzi Teleqraf Agentliyi (KCNA) bu gün belə bir barədə məlumat yayıb ki, KXDR hakimiyyəti qarşı tərəfin ictimai təşkilatlarının Şimala təbliğat vərəqələri göndərməsinə cavab olaraq yaxın zamanlarda Cənubi Koreya ilə bütün rabitə xətlərini bağlayacaq.
Cənubi Koreyanın Birləşmə Nazirliyi son hadisələr fonunda KXDR tərəfinin Kesson şəhərində yerləşən koreyalararası ofisə edilən zənglərə cavab vermədiyini bildirib. Koreya Respublikası Milli Müdafiə Nazirliyi də KXDR Silahlı Qüvvələrinin komandanlığı ilə əlaqə saxlaya bilmədiyini deyib.
Bölmənin digər xəbərləri
