Şimali Koreya Yaponiyanın NATO-da nümayəndəlik açmasına etiraz edir
Pekin, 21 yanvar, AZƏRTAC
Yaponiyanın NATO-da nümayəndəlik açması regionda hərbi gərginliyi təhlükəli dərəcədə çoxaldacaq.
AZƏRTAC xəbər verir ki, bu fikirlər Şimali Koreyanın rəsmi Koreya Mərkəzi Xəbər Agentliyinin (KCNA) məsələyə dair məqaləsində vurğulanır.
“Yaponiya Asiya-Sakit okean regionundakı təhlükəsizlik mühitinin ABŞ-nin təxribatçı hərbi hegemonluğu səbəbindən daha ciddi təhlükə altında olduğu bir vaxtda NATO-da müstəqil missiyasını yaradıb. Bu, regional vəziyyətə yeni qeyri-sabitlik gətirən təhlükəli bir hərəkətdir", - deyə KCNA-nın məqaləsində qeyd olunur.
Agentlik Yaponiyanı NATO-nun Asiya-Sakit okean regionunda təsir dairəsinin həddindən artıq genişlənməsinə dəstək olmaqda ittiham edib.
KCNA Yaponiyanı “müharibə cinayətləri dövləti”, sülhə qarşı qüvvə” adlandıraraq, onu açıq şəkildə silahlanmada və aramsız hərbi təlimlər vasitəsilə Asiya-Sakit okean regionunu təhdid etməkdə təqsirləndirib.
Qeyd edək ki, Rusiya-Ukrayna müharibəsi başlayandan sonra Yaponiya və Cənubi Koreya başda olmaqla Asiya-Sakit okean regionunun bəzi dövlətləri NATO ilə əlaqələrini gücləndirməyə başlayıb. Şimali Koreya bu əlaqələrə dəfələrlə sərt etirazını bildirib.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
