Şirvan-Salyan avtomobil yolu əsaslı şəkildə yenidən qurulur VİDEO
Bakı, 25 may, AZƏRTAC
Prezident İlham Əliyevin tapşırıq və göstərişlərinə əsasən regionların sosial-iqtisadi inkişafı dövlət proqramına uyğun olaraq respublika əhəmiyyətli yolların yenidən qurulması ilə müasir səviyyəyə çatdırılması sahəsində mühüm layihələrin icrası uğurla davam edir.
“Azərbaycan Avtomobil Yolları” Dövlət Agentliyinin İctimaiyyətlə əlaqələr şöbəsindən AZƏRTAC-a verilən məlumata görə, onlardan biri də Şirvan-Salyan avtomobil yoludur. Bu yolun yenidən qurulması ilə bağlı həyata keçirilən layihə sübut edir ki, ölkəmizdə avtomobil yollarının tikintisi və yenidən qurulması davamlı xarakter alıb.
Şirvan-Salyan avtomobil yolu uzun müddət əsaslı təmirsiz istismar olunurdu. Yolboyu torpaq yatağında, həmçinin örtükdə qabarma və dağılmalar yaranmışdı. Bu isə rahat şəkildə gediş-gəlişə maneə yaradırdı. “Azərbaycan Avtomobil Yolları” Dövlət Agentliyi tərəfindən texnoloji ardıcıllığa riayət olunmaqla və yüksək keyfiyyətlə aparılan yenidənqurma işləri ilə bu problem aradan qaldırılır.
Uzunluğu 31 kilometr olan Şirvan-Salyan avtomobil yolu Salyan və Şirvan şəhərləri arasında yerləşir. Yolun başlanğıcı Şirvan şəhəri, sonu isə M3 Ələt-Astara-İran İslam Respublikası ilə dövlət sərhədi avtomobil yolunun 47-ci kilometrdir.
II texniki dərəcəyə uyğun yenidən qurulan avtomobil yolunun ümumi eni 15 metr təşkil edir. Bura 7.5 metr enində hərəkət hissə, və hər bir istiqamət üzrə çiyinlərin eni bərkidici zolaqla bərabər 3.75 metr təşkil edəcək.
Layihə çərçivəsində yolun normativ eninin alınması üçün zəruri olan yerlərdə genişləndirmə işləri aparılır, yolun deformasiyaya uğramış yatağı qazılaraq çıxarılır, genişləndirilmiş və qazılaraq çıxarılmış ərazilərə yararlı qrunt tökülərək yayılır və kipləşdirilir.
Torpaq yatağı hazır olan hissələrdə yol əsasının inşası işləri aparılır. Yol əsasının alt layı 30 santimetr qalınlıqda qum-çınqıl, üst layı isə 12 santimetr qalınlıqda optimal-qırmadaş qarışığından inşa edilir. Bunun ardınca yolun asfaltlanması işləri aparılır. 2 laydan ibarət asfalt-beton örtüyü üçün 7 santimetr qalınlıqda iri dənəli, 5 santimetr qalınlıqda isə xırda dənəli asfalt-beton örtüyünün döşənməsi işləri aparılır. Artıq yolun 7 kilometrə yaxın hissəsində əsaslı tikinti işləri aparılaraq yekunlaşdırılıb. Ümumilikdə isə yolun 280 min kvadratmetrdən çox hissəsinin asfaltlanması nəzərdə tutulub. Yolboyu çiyinlərin bərkidilməsi işləri də görülür ki, bunun üçün 20 santimetr qalınlıqda optimal-çınqıl qarışığından istifadə olunur.
Layihəyə uyğun olaraq yolboyu mövcud suötürücü borular köhnəlib sıradan çıxdığı üçün yenilərinin inşasına zərurət yaranıb. Bunun üçün yola hər birinin uzunluğu 15 metr olan 25 ədəd 1 metr və 4 ədəd 1.5 metr diametrində dəmir-beton borular quraşdırılacaq, həmçinin yolun 15.4-cü kilometrində 1 ədəd suötürücü qurğu inşa ediləcək. Bundan başqa tikinti işləri çərçivəsində avtobus dayanacaqlarının tikintisi də nəzərdə tutulan işlərdəndir.
Daha sonra yolda hərəkətin normal təşkili üçün zəruri olan hissələrdə 362 ədəd yol nişanı və məlumatverici lövhə, 31 kilometr göstəricisi və 1240 ədəd siqnal dirəyi quraşdırılacaq, 93 kilometr uzunluğunda yol-cızgi və yolgöstərici xətlərinin çəkilişi işləri aparılacaq.
Qeyd edək ki, respublika əhəmiyyətli yolun tikintisi başa çatdıqdan sonra 20 yaşayış məntəqəsinin 120 mindən çox əhalisinin gediş-gəlişi xeyli yaxşılaşacaq. Bu tədbirlər vətəndaşların həyat şəraitinin yaxşılaşdırılması ilə yanaşı, Azərbaycan iqtisadiyyatının inkişaf səviyyəsini göstərir. Yolların yenidən qurulması yerləşdikləri ərazilərdə yük və sərnişin daşımasını xeyli yaxşılaşdırır, yetişdirilən məhsulların rahat şəkildə bazarlara daşınmasına imkan yaradır. Bu da kənd təsərrüfatının inkişafına müsbət təsir etməklə yolboyu yaşayan əhalinin sosial rifahının yüksəlməsinə imkan verir.
Bölmənin digər xəbərləri
