Mərasimi “525-ci qəzet”in baş redaktoru Rəşad Məcid açaraq dedi ki, beş il əvvəl-1998-ci il oktyabın 29-da “525-ci qəzet”də ARDNŞ-in birinci vitse-prezidenti, Milli Məclisin deputatı İlham Əliyevin “Neft bizim üçün məqsəd yox, vasitə olmalıdır” sərlövhəli müsahibəsi dərc olundu. Müsahibə həmin dövrdə ölkəmizin ictimai-siyasi həyatında geniş əks-səda doğurdu. Bu həmin dövr idi ki, respublikamızda prezident seçkiləri yenicə başa çatmışdı. Müxalifət yenə də öz qüvvələrinin sıx birləşdirilməsi istiqamətində fəaliyyət göstərməyə başlamışdı. Həmin vaxt ölkəmizin gələcəyinə, Azərbaycanda baş verən ictimai-siyasi proseslərə, müxalifət liderlərinə münasibət əks etdirən müsahibənin dərc olunması müxalif dairələrdə böyük narahatlıq yaratdı.

Natiq vurğuladı ki, respublikamızın müstəqil politoloqları, siyasətçiləri müsahibədə toxunulmuş məsələləri ətraflı müzakirə etdilər, öz fikirlərini bildirdilər. Oxuculara təqdim olunan bu kitaba həmin məşhur müsahibədən başlayaraq son beş il ərzində “525-ci qəzet”də İlham Əliyevin fəaliyyəti ilə bağlı dərc olunan yazılar toplanmışdır. Lakin 5 il keçməsinə baxmayaraq müsahibədə toxunulan həmin fikirlər bu gün də aktualdır.

Kitabın redaktoru R.Məcid dedi ki, bu topluda təkcə siyasətçilərin deyil, həm də tanınmış ziyalıların, hüquqşünasların, sadə adamların müxtəlif vaxtlarda İlham Əliyevin fəaliyyəti ilə bağlı fikirlərini əks etdirən materialları da verilmişdir.

Muzeyin direktoru, filologiya elmləri doktoru, professor, Milli Məclisin deputatı, kitaba “Ön söz”ün müəllifi Rəfael Hüseynov dedi ki, oktyabrın 28-də Azərbaycanın tarixində, millətimizin və dövlətimizin həyatında çox vacib hadisə baş verdi. Ölkəmizin prezidenti seçilmiş İlham Əliyevin prezidentlik səlahiyyəti Konstitusiya Məhkəməsi tərəfindən təsdiq edildi. Oktyabrın 28-dən İlham Əliyev Azərbaycanın rəhbəridir. Millətimiz bunun nə qədər əhəmiyyətli hadisə olduğunu yaxın gələcəkdə görəcəkdir. Mən XXI əsrdə ilk Prezidentimizə uğurlar arzulayıram və bu münasibətlə sizi təbrik edirəm.

“525-ci qəzet”in Azərbaycan mətbuatında öz yeri olduğunu vurğulayan natiq bildirdi: Təsadüfi deyil ki, İlham Əliyevlə həmin məşhur müsahibəni başqası deyil, məhz zamanın ab-havasını, nəbzini tutmağı bacaran “525-ci qəzet” verdi. İndi isə ötən 5 il ərzində İlham Əliyevlə bağlı verilmiş yazıları bir kitab halında oxuculara təqdim edir. Toplunu başqalarından fərqləndirən cəhət budur ki, kitabı bır adam yazmayıb. Bu kitabda çox müəllifin imzası vardır. Həm də bu toplu bir ilin yox, beş ilin məhsuludur. Ona görə də, kitab 5 il ərzində baş verən hadisələrin salnaməsidir. Həm də bu kitab mövqe dəyişilməzliyinin ifadəsidir. Buradakı yazıları izləyənlər görürlər ki, 1998-ci ildən bu günə qədər - Azərbaycan Prezidenti kürsüsünə yüksələnə qədər İlham Əliyevin mövqeyi, tutduğu xətt, yürütdüyü siyasət nə qədər dəyişməz olub.

Eyni zamanda, bu kitab həm də “525-ci qəzet”in mövqe sabitliyini əks etdirir. Son beş ildə çox qəzetlərin, siyasətçilərin mövqeyi dəyişib. Çox mürəkkəb bir zaman içərisində yaşayan, çaşmadan, sifətini dəyişmədən hadisələrə obyektiv qiymət vermək çətin məsələdir. Amma bütün çətinliklərə baxmayaraq, “525-ci qəzet” özünün sağlam mövqeyini qoruyub saxlaya bilmişdir. XVIII əsrin məşhur fransız filosofu Klod Adrian Helvetsi demişdir ki, kitablar da adamlara bənzəyir. Adamlara yaxınlaşanda pis və ya yaxşı mühitə düşdüyün kimi, kitabları da mütaliə edəndə pis və ya yaxşı mühitə düşürsən. Təsəvvür edin ki, tam 5 il ərzində İlham Əliyevlə bağlı yazıların toplandığı bu kitab bizdə nə qədər xoş təəssüratlar yaradır. Amma adlarını çəkmək istəmədiyim bir sıra qəzetlər var ki, son beş ildəki fəaliyyətləri ancaq iqtidara qarşı iftiralardan, qarayaxmalardan ibarətdir.

Odur ki, gərək mətbuat cəmiyyət və insanlar qarşısında öz məsuliyyətini dərk etsin. Bü mənada mən deyərdim ki, “525-ci qəzet” xalqı, oxucusu qarşısında öz borcunu ləyaqətlə yerinə yetirmişdir. Bu kitabda İlham Əliyevin fəaliyyəti necə var, eləcə də öz əksini tapıb.

Natiq onu da xüsusi vurğuladı ki, Azərbaycan mətbuatının bir sira nümayəndələri ilə yanaşı, “525-ci qəzet”in əməkdaşları da Azərbaycan parlamentinin Avropa Şurasında təmsilçiləri ilə birlikdə olur, bizim oradakı fəaliyyətimizi ölkəmizdəki oxuculara çatdırırlar. Əminəm ki, qəzet gələcəkdə İlham Əliyevin Prezidentlik fəaliyyətinin beş illiyini də əks etdirən daha bir kitab hazırlayacaqdır. Ona da əminəm ki, İlham Əliyev bir Prezident kimi millətimizi və dövlətimizi qarşıdakı illərdə çox böyük yüksəkliklərə çatdıracaqdır. Bu, sadəcə, gəlişigözəl sözlər deyil, onun arxasında İlham Əliyevin fəaliyyəti dayanır. O, son illər bir neçə sahəyə rəhbərlik edib. Həmin sahələrin hamısında çox böyük uğurlar qazanılıb. Mən belə hesab edirəm ki, bu kitab andiçmə mərasimi ərəfəsində “525-ci qəzet”in, o cümlədən sağlam mətbuatın Prezident İlham Əliyevə ən gözəl hədiyyəsidir.

Milli Məclis Aparatı beynəlxalq münasibətlər şöbəsinin müdiri Azər Qasımov “Siyasi olimpə doğru” kitabının işıq üzü görməsi münasibətilə mərasim iştirakçılarını təbrik etdi. Belə kitabların çap olunmasının xüsusi əhəmiyyət kəsb etdiyini vurğuladı. Dedi ki, cənab İlham Əliyev beynəlxalq aləmdə, müasir dünyamızda ən böyük şəxsiyyətlərdən olan Heydər Əliyevin siyasi kursunun davamçısıdır. Təsadüfi deyildir ki, təqdimatına toplaşdığımız bu kitabda İlham Əliyevin çoxsahəli fəaliyyətindən söz açılır. İlham Əliyevin fəaliyyətinin siyasi olimp adlandırılması da təbiidir. Onun siyasi olimpin zirvəsinə qalxaraq, Azərbaycan Respublikasının Prezidenti seçilməsi xalqımızın çox müdrik, vaxtında etdiyi bir seçimidir. İlham Əliyevin Prezident seçilməsi xalqımızın gələcəkdə daha da xoşbəxt olmasının qarantıdır.

Milli Məclisin deputatı Azər Kərimli dedi ki, topluda gedən yazılarda cənab İlham Əliyevin fəaliyyətinin son 5 ilindən söz açılır. Mənə belə gəlir ki, xalqımız İlham Əliyevin son 5 ildə gördüyü işləri nəzərə alaraq onu Prezident seçdi. Mənim kitabda bir müsahibəm var. Müsahibə İlham Əliyevin Avropa Şurasındakı fəaliyyətindən bəhs edir.

Natiq bildirdi ki, seçkiqabağı görüşlərdə qeyd olunduğu kimi, Azərbaycan iqtisadiyyatının inkişafında İlham Əliyevin böyük rolu vardır.

Milli Məclisin deputatlarının, ədəbiyyat və sənət adamlarının iştirak etdikləri mərasimə R.Məcid və R.Hüseynov yekun vurdular.