SON MƏNZİLƏ
İyulun 7-də respublikamızın ictimaiyyəti muğam sənətinin görkəmli nümayəndəsi, xalq artisti Yaqub Məmməd oğlu Məmmədovu son mənzilə yola salmışdır.
Mərhumun cənazəsi Rəşid Behbudov adına Dövlət Mahnı Teatrının matəmsayağı bəzədilmiş səhnəsində postament üzərində qoyulmuşdu. Postamentin ətrafına Azərbaycan Respublikasının Prezidenti Heydər Əliyevin adından, habelə, respublikanın hökumət təşkilatlarının, yaradıcılıq ittifaqlarının adından əklillər düzülmüşdü.
Salonda həzin matəm musiqisi səslənirdi. Mədəniyyət, incənət xadimləri, mərhumun sənətinin pərəstişkarları cənazənin yanında fəxri qarovulda dayandılar, muğam sənətinin görkəmli nümayəndəsinə öz ehtiramlarını bildirdilər.
Matəm mərasimini mədəniyyət naziri Polad Bülbüloğlu açdı.
Xalq artisti, professor Arif Babayev, xalq artisti, professor Ramiz Quliyev, “Lalə” qızlar ansamblının bədii rəhbəri, əməkdar artist Ceyran Haşımova və şair Ənvər Əhməd matəm mitinqində çıxış etdilər.
Natiqlər vurğuladılar ki, xalq musiqisinin incəliklərinə dərindən bələdliliyi və özünəməxsus ifaçılıq tərzi ilə miili musiqimizi zənginləşdirmiş Yaqub Məmmədov dərin tarixi kökləri, qədim ənənələri olan Azərbaycan xanəndəlik məktəbində layiqli yer tutaraq, onun inkişafına öz töhfəsini vermişdir. O, ecazkar səsi, bənzərsiz ifaçılığı, dinləyicinin daxili aləminə nüfuz etmək, ona güclü emosional təsir göstərmək bacarığı ilə muğam biliciləri, ümumən musiqisevərlər arasında böyük hörmət və nüfuz, dərin məhəbbət qazanmışdır.
Görkəmli xanəndə milli musiqi mədəniyyətinin inkişafındakı xidmətlərinə görə ölkəmizin ali mükafatı - “Şöhrət” ordeni ilə təltif edilmiş, Azərbaycan Respublikası Prezidentinin fərdi təqaüdünə layiq görülmüş ilk muğam ifaçılarından biri olmuşdur.
Mərhumun yaxın qohumu Sədyar Şükürov mərasimdə çıxış edərək, Yaqub Məmmədovun yaradıcılığına verdiyi yüksək qiymətə,xatirəsinə göstərdiyi hörmət və ehtirama görə Prezident Heydər Əliyevə mərhumun ailəsi adından dərin minnətdarlığını bildirdi, vida mərasiminə toplaşanlara təşəkkür etdi.
X X X
Matəm mərasimi başa çatdıqdan sonra mərhumun cənazəsi qəbiristanlığa gətirildi. Burada mərhumun ruhuna dua oxundu. Böyük xanəndə, vətənpərvər sənətkar və təvazökar insan kimi əziz xatirəsi xalqımızın qəlbində həmişə yaşayacaq Yaqub Məmmədovun cənazəsi doğma torpağa tapşırıldı. Məzarın üzərinə əklillər, gül dəstələri düzüldü.
Allah rəhmət eləsin, qəbri nurla dolsun!
Bölmənin digər xəbərləri
